پاکستان ہاکی فیڈریشن کے سیکرٹری آصف باجوہ نے کہا ہے کہ پاکستان میں غیر ملکی ہاکی ٹیمیں سفر نہیں کرتی ہیں۔

پاکستان ہاکی فیڈریشن کے سیکرٹری آصف باجوہ، ہیڈ کوچ خواجہ جنید کی لاہور پریس کلب میں میٹ دی پریس سے گفتگو کرتے ہوئے کہا کہ پاکستان ہاکی کا زوال 80 کی دہائی سے شروع ہوگیا تھا، جب سے ہاکی آسٹروف پر گئی پاکستان کا زوال شروع ہوا۔

آصف باجوہ کا کہنا تھا کہ آج پاکستان ہاکی ٹیم ورلڈ نمبر ون سے 17ویں نمبر پر کھڑی ہے، پاکستان ہاکی پہلے ہی مشکلات کا شکار تھی، کورونا نے بھی بہت نقصان پہنچایا ہے۔

انہوں نے کہا کہ پاکستان میں غیر ملکی ہاکی ٹیمیں سفر نہیں کرتیں، آسٹریلیا کرکٹ ٹیم اگر آتی ہے تو تمام سپورٹس پر مثبت اثر پڑیگا۔

انکا کہنا تھا کہ گزشتہ 3 سال سے صرف ساڑھے 17 لاکھ روپے پاکستان ہاکی کو ملے جو ناکافی ہیں، فنڈز نہ ہونے کی وجہ کھلاڑیوں کو بین الاقوامی معیار کی ٹریننگ نہیں کروا سکتے۔

آصف باجوہ کا مزید کہنا تھا کہ کھلاڑیوں کو تیاری کیلئے ہائی پرفارمنس کوچنگ سینٹر ناگزیر ہے، ایف آئی ایچ کے ساتھ معاہدہ کیا جہاں پاکستان کے کوچز تربیت لیں گے۔