پاکستان شوبز انڈسٹری کے معروف گلوکار سجاد علی کا نیا گانا ‘قرار ‘ ریلیز ہونے کے لیے تیار ہو گیا۔

تفصیلات کے مطابق گلوکار سجاد علی کے اس نئے گانے میں پاکستان کی ہر دل عزیز اداکارہ سونیا حسین جلوے بکھیرتی نظر آئیں گی۔

اداکارہ سونیا حسین اور سجاد علی نے اپنے اس نئے گانے کی ریلیز کا اعلان سوشل میڈیا اکاؤنٹس پر شیئر کی گئی پوسٹس میں کیا ہے۔

دونوں نے اعلان کیا کہ ان کا گانا ’قرار ‘ 17 نومبر کو ریلیز ہوگا۔

گلوکار سجاد علی نے فوٹو اینڈ ویڈیو شیئرنگ ایپ انسٹاگرام پر میوزک ویڈیو کے پوسٹر شیئر کرتے ہوئے کہا کہ ‘اب وقت آگیا ہے۔

دوسری جانب سونیا حسین نے بھی میوزک ویڈیو کا پوسٹر شیئر کیا اور کہا کہ ’بہت کم ہی کوئی ایسا محسوس کرتا ہے کہ ایک فنکار کے طور پر اس کی تکمیل ہو۔

اداکارہ سونیا حسین نے کہا کہ ’ اپنے طور پر ایک لیجنڈ، سجاد علی اور میں آرٹ کا یہ خوبصورت نمونہ’قرار’ لا رہے ہیں۔

انہوں نے کہا کہ یہ ایک ایسی شوٹنگ تھی جو بہت معنی خیز اور جذبات سے بھرپور تھی جو مجھے ہمیشہ یاد رہےگی۔

اس کے علاوہ اداکارہ سونیا حسین نے ایک اور پوسٹ میں اپنی میوزک ویڈیو سے متعلق خوشی ظاہر کی ہے۔

یاد رہے کہ سونیا حسین نے اکتوبر میں ’قرار‘ کی شوٹنگ کے دوران لی گئی ایک تصویر بھی شیئر کی تھی۔

سجاد علی نے اپنے کیریئر میں بے شمار کامیاب گانے گائے ہیں، ان میں ’بے بی‘ ، ’چیف صاحب‘، ‘تم ناراض’، ‘ہر ظلم’ اور ‘رونے نہ دیا’ شامل ہیں۔

واضح رہے کہ گلوکار سجاد علی کے کیریئر کا پہلا البم 1979 میں ریلیز ہوا تھا، جو بہت کامیاب  ہوا تھا۔