بھارتی کرکٹ ٹیم کے اوپننگ بیٹسمین روہیت شرما کا ماننا ہے کہ ایسے رنز اور سنچریوں کا کوئی مطلب نہیں ہے جس میں آپ ٹرافی نہ جیت سکیں۔

تفصیلات کے مطابق انٹرنیشنل کرکٹ کونسل (آئی سی سی) کے سوشل میڈیا ہینڈل سے گفتگو کرتے ہوئے روہیت شرما نے کہا کہ 2016 سے اب تک، میں صرف اتنا دیکھ سکتا ہوں کہ میں نے کافی تجربہ حاصل کیا ہے، میں 2016 کے مقابلے میں ایک بلے باز کے طور پر بہت زیادہ پختہ ہو چکا ہوں۔

روہیت شرما نے کہا کہ کھیل کو سمجھنا ضروری  ہے، آپ کو ہمیشہ ٹیم کو اپنے آپ سے آگے رکھنا ہوتا ہے اور یہ دیکھنا ہوتا ہے کہ ٹیم کو اس وقت کیا ضرورت ہے۔

See more

بھارتی کرکٹر نے کہا کہ کوشش کریں اور ایک یا دو لمحے نکالیں اور سوچیں کہ اگر میں شاٹ کھیلنے جا رہا ہوں تو کیا ٹیم کو اس وقت اس کی ضرورت ہے یا نہیں۔

اُنہوں نے کہا کہ جب آپ اپنی ٹیم کے لیے اننگز کا آغاز کرتے ہیں، تو آپ کے پاس زیادہ سے زیادہ گیندوں کا سامنا کرنے کا بہترین موقع ہوتا ہے، آپ زیادہ سے زیادہ رنز حاصل کرتے ہیں۔

روہیت شرما نے مزید کہا کہ میرے خیال میں ایسے رنز اور سنچریاں بےمطلب ہیں جن کے بعد آپ ٹرافی نہ جیت سکیں۔

واضح رہے کہ روہیت شرما نے ٹی ٹوئنٹی ورلڈ کپ میں بدھ کو افغانستان کے خلاف 74 رنز اسکور کرکےپلیئر آف دی میچ کا ایوارڈ حاصل کیا تھا۔