عظمیٰ بخاری کا کہنا ہے کہ تحریک انصاف کو معلوم تھا این اے 133سے شکست انکا مقدر ہوگی۔

مسلم لیگ(ن) پنجاب کی ترجمان عظمیٰ بخاری نے ترجمان پنجاب حکومت کی پریس کانفرنس پر ردعمل دیتے ہوئے کہا کہ کل رات تحریک انصاف کے جلسے میں “نو عمران اونلی عوام” کے نعرے لگتے رہے۔

انہوں نے کہا کہ تحریک انصاف کے کارکنوں نے بھی عمران خان کو مسترد کردیا ہے۔ آر ٹی ایس کی مہربانی سے اقتدار میں آنے والے کس منہ سے ووٹ کے تقدس کی بات کرسکتے ہیں۔

عظمیٰ بخاری نے کہا کہ چیئرمین سینٹ کا الیکشن، ڈسکہ الیکشن سمیت تمام الیکشن تحریک انصاف نے چوری کیے، کرائے کے ترجمان منہ کھولنے سے پہلے حقائق بھی چیک کرلیا کریں۔

ان کا کہنا ہے کہ حسان خاور، فردوس باجی ٹو اور فیاض چوہان کی کاربن کاپی بننے کی کوشش کررہے ہیں، لاہور میں وہ سیٹ جو اللہ کے کرم سے ہمیشہ ن لیگ کی رہی ہے، وہاں آپکی بنائی جعلی ویڈیو آپ کی شکست کے زخم چاٹنے جیسی ہے۔

مسلم لیگ(ن) کی ترجمان کا کہنا ہے کہ پرچی ترجمان صاحب آپ لوگوں کو اب این اے 133کے الیکشن کا نام لیتے بھی شرم آنی چاہیے، جس جماعت کا امیدوار کاغذات نامزدگی درست جمع نہیں کراسکا وہ الیکشن لڑیں گے؟

عظمیٰ بخاری نے کہا کہ عمران خان اپنے کھودے گڑوں میں خود گر رہے ہیں، تحریک انصاف کو معلوم تھا این اے 133سے شکست انکا مقدر ہوگی، شرمناک شکست کی وجہ سے تحریک انصاف الیکشن سے بھاگی ہے۔

ان کا کہنا ہے کہ ثاقب نثار کی آڈیو کا فرائنزک ہوچکا ہے، لاڈلے کو لانے کی سازش بھی بے نقاب ہوچکی ہے، لاڈلے نے ملکی تاریخ کے سب سے زیادہ قرضے بھی لیے اور قوم کو مہنگائی کے ناقابل یقین تحفے بھی دیئے، آج پاکستان کا ہر شہری اڑھائی لاکھ روپے کا مقروض ہو چکا ہے۔

عظمیٰ بخاری نے مزید کہا کہ عمران خان اور انکی جماعت مہنگائی کے بوجھ تلے دب کر خود ہی فنا ہونے والی ہے، مسلم لیگ(ن) تمام اوچھے ہتھکنڈوں کے باوجود پاکستان کی مقبول ترین جماعت ہے، آئندہ الیکشن میں مسلم لیگ ن بھاری اکثریت سے کامیاب ہوکر حکومت بنائے گی۔