پاکستان مسلم لیگ (ن) کی ترجمان مریم اورنگزیب نے ملک میں چینی کی قیمتوں میں اضافے کا ذمے دار عمران خان کو قرار دے دیا۔

مریم اورنگزیب نے جاری کردہ بیان میں کہا ہے کہ  چینی صرف اور صرف عمران صاحب کے فیصلوں کی وجہ سے مہنگی ہو رہی ہے، چینی کی قیمتوں میں اضافہ صرف عمران صاحب کے اے ٹی ایمز ، کارٹلز اور مافیا کو فائدہ پہنچ رہا ہے۔

انہوں نے حکومت پر تنقید کرتے ہوئے کہاکہ ڈالر کی طرح چینی کی قیمت کی پرواز کے بعد عمران صاحب استعفیٰ دیں ،قوم کی جان چھوڑیں اور مہنگائی سے عوام کا گلا نہ گھونٹیں۔

ترجمان مسلم لیگ ن نے کہاکہ عمران صاحب کا خطاب ختم ہوا اور ساتھ ہی عوام پر چینی کا بم گرا دیا ، گھی اور خوردنی تیل سب کچھ مزید مہنگا ہوگیا۔

 مریم اورنگزیب کا کہنا تھا کہ عمران صاحب نے یہ ریلیف پیکج دیا کہ چینی 145 اور 150 روپے کلو پر پہنچ گئی ،عمران صاحب کے ہر خطاب اور فیصلے کے نتیجے میں قوم کو آنسو ملے۔

مسلم لیگی رہنما نے کہاکہ عوام کو لوٹ کر عمران صاحب اپنے اے ٹی ایمز، کارٹلز اور مافیاز کی جیبیں بھر رہے ہیں، مہنگائی حکومت کے جھوٹ کی طرح بڑھتی جارہی ہے۔

ان کا مزید کہناتھا کہ چینی کمیشن کی رپورٹ کہاں ہے؟ اس لئے دبائی گئی ہے تاکہ چینی مہنگی اور مافیاز فائدہ اٹھاتے جائیں ، مافیاز پر پلنے والی حکومت عوام کو صرف تکلیف دے سکتی ہے۔

دوسر جانب مسلم لیگ (ن) کی ترجمان عظمیٰ بخاری نے بھی  چینی کی قیمت میں اچانک اضافے پر ردعمل دیتے ہوئے کہا کہ ظل تباہی نے کل ریلیف پیکج نہیں فراڈ پیکج کا اعلان کیا تھا، ظل تباہی کے اعلان کے بعد سب سے پہلے گھی کی قیمت میں 19روپے اضافہ ہوا ہے۔

انہوں نے کہا کہ آج چینی کا فی کلو ریٹ 134روپے سے 140روپے تک کلو پہنچ گیا ہے، لاہور اکبری منڈی میں آج چینی تھوک ریٹ پر 134روپے اور عام مارکیٹ میں 140روپے کلو فروخت ہورہی ہے، پشاور، کراچی، کوئٹہ اور گوجرنوالہ میں بھی چینی 135روپے کلو فروخت ہورہی ہے۔

عظمیٰ بخاری نے کہا کہ عمران خان کو اپنا نام تبدیل کر کے ”مسٹر فراڈیہ“ رکھ لینا چاہیے، ایک فراڈیہ پنجاب میں بیٹھا دوسرا فراڈیہ وفاق میں بیٹھ کر عوام کے جیبوں پر ڈاکے مار رہا ہے۔

مسلم لیگ (ن) کی ترجمان کا کہنا تھا کہ عمران خان عوام کے نہیں اپنے دوستوں کے پیارے بن کر رہ گئے ہیں، عمران خان کے لئے 22 کروڑ عوام صرف اپنی کابینہ ، دوست اور شوکت خانم کے ملازمین ہیں۔

انہوں نے مزید کہا کہ عمران خان نے چینی، پیٹرول، ادویات اور گندم کی مد میں 2 ہزار ارب کا ڈاکہ مارا ہے، وہی 2ہزار ارب قومی خزانہ میں جمع کروائیں اور عوام کے لئے ریلیف پیکج کا اعلان پھر کریں۔