لاہور چیمبر کے صدر میاں نعمان کبیر نے کہا ہے کہ حکومت کو ملٹی نیشنل کمپنیوں کے ساتھ ٹیکنالوجی کی منتقلی کو یقینی بنانا چاہیے۔

لاہور چیمبر میں ڈیری سیکٹر کی پیداوار میں اضافے کے موضوع پر سیمینار ہوا جس میں لاہور چیمبر کے صدر میاں نعمان کبیر، سینئر نائب صدر میاں رحمان عزیز چن، نائب صدر حارث عتیق، پنجاب کے وزیر پبلک پراسیکیوشن چوہدری ظہیر الدین خان، سابق وزیر برائے لائیو اسٹاک اینڈ ڈیری ڈویلپمنٹ بھی موجود تھے۔

اس موقع پر ممتاز خان منیس، سیکرٹری لائیو اسٹاک اینڈ ڈیری ڈویلپمنٹ نوید حیدر شیرازی و دیگر ماہرین نے بھی شرکت کی۔

سیمینار میں وزیر پبلک پراسیکیوشن چوہدری ظہیر الدین خان نے کہا کہ دودھ اور اس کی مصنوعات کی پراسیسنگ کر کے برآمدات بڑھائی جاسکتی ہیں، چیمبر کی تجاویز کو زیرِ غور لائیں گے۔

ان کا کہنا تھا کہ پاکستان دودھ کے علاوہ حلال گوشت کی برآمدات میں حصہ بڑھا سکتا ہے، اعلیٰ نسل کی بھینسوں و گایوں کی بریڈنگ پر توجہ دینے کی ضرورت ہے۔

وزیر پبلک پراسیکیوشن چوہدری ظہیر الدین خان نے مزید کہا کہ لاہور چیمبر کی ڈیری سیکٹر کی ڈویلپمنٹ کے لیے کوششیں قابلِ تعریف ہیں۔

لاہور چیمبر کے صدر میاں نعمان کبیر کا کہنا تھا کہ ملک میں ویلیو ایڈیشن کی حوصلہ افزائی اور فروغ کے لیے حکومت کو ڈیری پروسیسنگ مشینری/ آلات کی در آمد پر ڈیوٹی اور ٹیکس معاف کرنا چاہیے، حکومت کو چاہیے کہ وہ دودھ کی پیداوار بڑھانے کے لیے پرائیویٹ سیکٹر کوسہولیات دے۔

انہوں نے کہا کہ حکومت کو آسٹریلیا اور سویڈن جیسے ممالک سے تعلق رکھنے والی ملٹی نیشنل کمپنیوں کے ساتھ ٹیکنالوجی کی منتقلی اورجوائنٹ وینچرز کو یقینی بنانا چاہیے جو دنیا بھر میں اپنے جدید ڈیری سیکٹر کے لیے مشہور ہیں۔

لاہور چیمبر کے صدر میاں نعمان کبیر کا مزید کہنا تھا کہ اس شعبے کو کسانوں اور سرمایہ کاروں کے لیے معاشی طور پر موثر بنانے کے لیے مویشیوں کی پیداوار، مصنوعات کی پروسیسنگ اور مارکیٹنگ کے لئے ریسرچ کے فروغ کی ضرورت ہے۔