بھارت کے سابق کرکٹر اور  موجودہ سیاستدان نوجوت سنگھ سدھو کے لئے عمران خان کو ’بڑا بھائی‘ کہنا ان کے اپنے ملک میں جرم بن گیا۔

نوجوت سنگھ سدھو سکھ مت کے بانی بابا گرو نانک کے یوم پیدائش کی مناسبت سے جاری تقریبات میں شرکت کے لئے کرتار پور پہنچے، جہاں انہوں نے ایک مرتبہ پھر وزیر اعظم عمران خان کی تعریفیں کیں اور انہیں ’بڑا بھائی‘ کہا لیکن بھارت کے ہندو انتہا پسندوں کو سدھو کی وزیر اعظم کے ساتھ بھائی بندی ذرا نہیں بھائی۔ بھارت میں بر سر اقتدار ہندو انتہا پسند جماعت بی جے پی نے سدھو کے خلاف محاذ کھول لیا ہے۔

بی جے پی کے ترجمان امت مالویہ نے ٹوئٹر پر نوجوت سنگھ سدھو پر تنقید کرتے ہوئے کہا کہ نوجوت سنگھ سدھو پاکستان کے وزیر اعظم عمران خان کو اپنا ’بڑا بھائی‘ کہتے ہیں۔ گزشتہ بار انہوں نے پاکستانی فوج کے سربراہ جنرل قمر باجوہ کو گلے لگایا تھا اور ان کی بہت تعریف کی تھی،اس میں کوئی حیرانی کی بات بھی نہیں ۔

واضح رہے کہ نوجوت سندگھ سدھو وزیر اعظم عمران خان کی حلف برداری کی تقریب میں شریک ہوئے تھے، انہوں نے اس وقت آرمی چیف جنرل قمر جاوید باجوہ سے گلے مل کر کرتار پور کے حوالے سے بات کی تھی۔