کراچی: نیب کی ٹیم اسپیکر سندھ اسمبلی آغا سراج دُرّانی کو لے کر اسلام آباد سے کراچی پہنچ گئی۔

نیب ٹیم آغا سراج درانی کو پی آئی اے کی پرواز PK 309 سے لیکر کراچی ایرپورٹ پہنچی۔

اسلام آباد کی احتساب عدالت نے نیب کے ہاتھوں گرفتار آغا سراج درانی کا 2 روزہ  راہداری ریمانڈ منظور کیا ہے۔

نیب کراچی کی ٹیم اسپیکر سندھ اسمبلی کو نیب کراچی ہیڈکوارٹر منتقل کرے گی۔

خیال رہے کہ اسپیکر سندھ اسمبلی آغا سراج درانی نے 3 دسمبر بروز جمعہ عدالتِ عظمیٰ پاکستان کے حکم پر نیب کو سرینڈر کیا، جس کے بعد نیب نے انہیں اسلام آباد میں واقع سپریم کورٹ کی عمارت کے باہر سے گرفتار کرلیا۔

سپریم کورٹ اب آغا سراج درانی کے مقدمے پر آئندہ ہفتے سماعت کرے گی۔

رواں برس اکتوبر میں سندھ ہائیکورٹ نے اثاثہ جات کیس میں آغا سراج درانی کی ضمانت مسترد کردی تھی، جس کے بعد آغا سراج درانی روپوش ہو گئے تھے۔

سندھ ہائیکورٹ سے ضمانت مسترد ہونے کے بعد آغا سراج درانی نے سپریم کورٹ جانے کا فیصلہ کیا تھا۔

واضح رہے کہ نیب نے آغا سراج درّانی، ان کی اہلیہ، بچوں، بھائی اور دیگر ملزمان پر غیر قانونی طور پر ایک ارب 61 کروڑ روپے کے اثاثے رکھنے کا الزام عائد کیا تھا۔