مولانا طاہر اشرفی نے کہا ہے کہ سری لنکن واقعے میں ملوث افراد کو پتا ہی نہیں کہ توہین رسالتﷺ کیا ہے۔

 وزیراعظم کے معاون خصوصی برائے مذہبی امور مولانا طاہر اشرفی نے کہا کہ وزیراعظم نے کہا ہے کہ ہم اس ملک میں کسی کو مذہب کے نام پر بدمعاشی نہیں کرنے دیں گے۔

انہوں نے کہا کہ اب ایسا نہیں ہوگا کہ جس کو چاہو قتل کردو، جلا دو ، کوفہ والوں سے صرف ناراضگی یہ ہے کہ وہ خاموش رہے ، ہمیں بطور پاکستانی پاکستانیوں کا مقدمہ لڑنا ہے ، کوٹ رادھا کشن میں جس خاتون کو جلایا گیا اس کے پیٹ میں بچہ تھا ، اب کوئی سکون سے نہ بیٹھے یہ آگ سب کے گھر جائے گی ، چالیس سال سے اس آگ کو بھڑکایا جارہا ہے۔

وزیراعظم کے معاون خصوصی برائے مذہبی امور نے کہا کہ ایک مہمان کو صرف اس لیے جلایا گیا کہ اس نے کام پورا کرنے اور تنخواہ لینے کو کہا تھا ، ایک سال میں 137 شکایات کا حل نکالا ہے ، ہم سب کو سیالکوٹ کا عدنان بننا ہے ، عدنان نے سری لنکن کو بچانے کی کوشش کی ، ہم سب کو مل کر گھر کو جلنے سے بچانا ہوگا۔

مولانا طاہر اشرفی نے کہا کہ ہم اپنے بچوں کو خوفزدہ پاکستان نہیں دیں گے ، اب قائد اعظم کا پاکستان بنائیں گے جو ہمارا بھی ہے اور اقلیت کا بھی ہے ، رمشا مسیح پر پاکستان کونسل نے کہا تھا کہ یہ ہماری بیٹی ہے ، یہ چند انتہا پسندوں کا ملک نہیں یہ کروڑوں اعتدال پسندوں کا ملک ہے ، ہمارے رہنماؤں کو ایسی گفتگو کرنے سے باز رہنا چاہیے۔

انہوں نے کہا کہ ہم کسی قاتل کے ساتھ کھڑے نہیں ہوسکتے قاتل قاتل ہے، سانحہ سری لنکن پر پھر موقع ملا ہے کہ ہم ایک ہوں اور نیشنل ایکشن پلان پر عمل کریں ، میں شرمندہ ہوں، پوری قوم کے سامنے گوجرانولہ کے حافظ قرآن سے سری لنکن تک معافی مانگتا ہوں ، پاکستان میں اپنے مقاصد کے لیے توہین رسالتﷺ کا جھوٹا الزام لگانے والے کو بھی اسی قانون کے تحت سزا دی جائے۔

وزیراعظم کے معاون خصوصی برائے مذہبی امور مولانا طاہر اشرفی نے کہا کہ سری لنکن واقع میں ملوث افراد کو پتا ہی نہیں کہ توہین رسالتﷺ کیا ہے ، سیالکوٹ واقع میں ملوث لوگوں کو کلمہ نہیں آتا نماز صحیح طرح ادا نہیں کرسکتے ، مشترکہ نعرہ ہے کہ پاکستان میں کسی کو دین کا نام غلط استعمال نہیں کرنے دیں گے ، جنرل قمر جاوید باجوہ اور وزیراعظم عمران خان کہہ رہے ہیں کہ اب انتہا پسندی قبول نہیں کی جائے گی ، چیف جسٹس صاحب سے مطالبہ کرتے ہیں سانحہ سری لنکن میں ملوث افراد کو لٹکایا جائے۔