وزیراعلیٰ خیبر پختونخوا محمود خان نے کہا ہے کہ بلدیاتی انتخابات کا پہلا مرحلہ مجموعی طور پر پر امن رہا۔

محمود خان سے چیف سیکرٹری خیبر پختونخوا شہزاد بنگش اور انسپکٹر جنرل پولیس معظم جاہ انصاری کی ملاقات ہوئی جس میں بلدیاتی انتخابات کے دوسرے مرحلے کے پر امن انعقاد سے متعلق امور پر تبادلہ خیال کیا گیا۔

ایڈیشنل چیف سیکرٹری شہاب علی شاہ بھی ملاقات میں موجود تھے۔

ملاقات میں بلدیاتی انتخابات کے پہلے مرحلے میں بعض مقامات پر پیش آنے والے ناخوشگوار واقعات کا جائزہ بھی لیا گیا ہے۔

اس کے علاوہ ملاقات میں ان انتخابات کے دوسرے مرحلے میں اس طرح کے ناخوشگوار واقعات کی روک تھام کے لئے لائحہ عمل پر گفتگو بھی کی گئی ہے۔

وزیراعلیٰ محمود خان نے ملاقات میں گفتگو کرتے ہوئے کہا کہ بلدیاتی انتخابات کا پہلا مرحلہ مجموعی طور پر پر امن رہا، تاہم بعض جہگوں پر کچھ ناخوشگوار واقعات رونما ہوئے۔

انہوں نے ہدایت دی کہ ان انتخابات کے دوسرے مرحلے میں اس طرح کے واقعات کا تدارک یقینی بنایا جائے، بلدیاتی انتخابات کے دوسرے مرحلے کے پر امن انعقاد کے لئے ابھی سے انتظامات اور تیاریوں کا عمل شروع کیا جائے۔

وزیراعلیٰ خیبر پختونخوا کا کہنا ہے کہ اس سلسلے میں ضلعی انتظامیہ، پولیس اور الیکشن کمیشن کے درمیان کوآرڈینیشن کا موثر نظام وضع کیا جائے۔

انہوں نے کہا کہ صوبائی حکومت بلدیاتی انتخابات کے دوسرے مرحلے کے پر امن ماحول میں صاف اور شفاف انعقاد کے لئے پر عزم ہے، اس مقصد کے لئے دستیاب تمام مالی وسائل اور افرادی قوت کا موثر استعمال عمل میں لایا جائے۔

محمود خان نے مزید کہا کہ صوبائی حکومت ان انتخابات کے پرامن اور صاف و شفاف انعقاد کے لئے درکار تمام وسائل فراہم کرے گی۔