جنیوا:اقوام متحدہ کی رپورٹ کے مطابق دنیا کی بڑی آبادی ابھی بھی انٹرنیٹ سے محروم ہے اور یعنی ہر تین میں سے ایک فرد نے کبھی انٹر نیٹ استعمال نہیں کیا۔ اس طرح کل دو ارب نوے کروڑ افراد کی رسائی انٹرنیٹ تک نہیں ہے جو دنیا کی آبادی کا 37 فیصد ہے۔ یہ انکشاف اقوام متحدہ کے ذیلی ادارے ٹیلی کمیونکیشن بیورو کی جانب سے جاری کردہ ایک رپورٹ میں کیا گیا ہے۔

 اقوام متحدہ کے مطابق کورونا وبا کے دوران انٹرنیٹ کے استعمال میں تقریبا 17 فیصد اضافہ ہوا جس کی وجہ سخت لاک داؤن اور وبا کے بارے میں معلومات حاصل کرنے کے لئے لوگوں کی بڑی تعداد کا انٹرنیٹ کی جانب رخ کرنا تھا۔ اس طرح اب کل چار ارب نوے کروڑ افراد انٹرنیٹ تک رسائی رکھتے ہیں۔

اقوام متحدہ نے عام آدمی کی انٹرنیٹ تک رسائی پر خوشی کا اظہار کیا لیکن ساتھ انہوں نے وبا کے دوران عالمی انٹرنیٹ خلیج یا ڈیجیٹل ڈیوائڈ کو بھی واضح کیا ہے کیو نکہ اس سے دنیا بھر کے اساتذہ اور طالب علم متاثر ہو ئے ہیں اور لاک ڈاؤن کی وجہ سے ان کی مشکلات میں مزید اضافہ ہوا۔

جبکہ اس وبا کے دوران امریکا جیسے ملک میں بھی کئی غریب اور پسماندہ علاقے ایسے ہی جہاں کے اساتذہ اور بچے انٹرنیٹ جیسی سہولت سے محروم تھے اور جس کی وجہ سے ان کا تعلیمی سفر تعطل کا شکار رہا اس طرح دنیا بھر میں کروڑوں بچوں کا بہت زیادہ تدریسی نقصان ہوا اور یہ نقصان انٹرنیٹ نہ ہو نے کی سبب ابھی بھی جاری ہے۔