ایم کیو ایم کے رہنما اسامہ قادری نے کہا ہے کہ بغیر پڑھے ہم سے بل منظور کراوانا مناسب رویہ نہیں۔

اسامہ قادری نے قومی اسمبلی میں منی بجٹ پر گفتگو کرتے ہوئے کہا کہ بغیر پڑھے ہم سے بل منظور کراوانا مناسب رویہ نہیں، ہمیں معلوم ہونا چاہیئے بل میں کیا لایا جا رہا ہے۔

ان کا کہنا تھا کہ بغیر دیکھے بل کو سپورٹ کرنے کی پوزیشن میں نہیں ہیں، ایم کیو ایم کے اراکین اسمبلی کو بے خبر رکھا گیا ہے۔

دوسری جانب ایم کیو ایم کے رہنما اقبال محمد خان نے بھی منی بجٹ پر گفتگو کرتے ہوئے کہا کہ ساڑھے تین سال سے حکومت کے اتحادی ہیں مگر بہت سے معاملات پر مشورے نہیں لیے جاتے، منی بجٹ پر بھی ہم سے مشورہ نہیں لیا گیا جس پر ہمارے تحفظات ہیں۔

ان کا کہنا تھا کہ صنعت کاروں اور کاروباری افراد کے بھی بل پر بہت سے تحفظات ہیں، عوام ہم سے سوالات کرتے ہیں ہم نے ان کو بھی جواب دینا ہوتا ہے۔

 ایم کیو ایم کے رہنما اقبال محمد خان نے مزید کہا کہ بل پر ووٹ دینے یا نہ دینے سے متعلق فیصلہ ابھی  نہیں ہوا۔