پرتگال سے تعلق رکھنے والے مشہور و معروف فٹ بالرکرسچیانو رونالڈو کا دھاتی مجسمہ بھارتی ریاست گوا میں نصب کرنے پر لوگوں نے مظاہرہ کیا۔

بین الاقوامی خبر رساں ایجنسی کے مطابق مظاہرین نے مجسمے کی تنصیب کو مقامی کھلاڑیوں کی تذلیل قرار دیا۔

بھارتی ریاست گوا کے ایک قصبے کالنگوٹ کے رہائشیوں نے سیاہ جھنڈوں کے ساتھ مجسمے کے مقام پر اپنا احتجاج ریکارڈ کرایا۔

کرسچیانو رونالڈو کا یہ مجسمہ گزشتہ ہفتے ہی نصب کیا گیا تھا اور اس کی رونمائی کی تقریب بھی منعقد کی گئی تھی۔

مظاہرین کا کہنا تھا کہ مقامی انتظامیہ نے جس کھلاڑی کا مجسمہ نصب کیا ہے اس کا ملک ہماری ریاست پر قابض رہا ہے اور ہم نے 1961 میں اس سے  آزادی حاصل کی تھی۔

مظاہرین کا کہنا تھا کہ انتظامیہ نے یہ مجسمہ نصب کر کے مقامی کھلاڑیوں حوصلہ شکنی کی ہے اور بھارت کے اسٹارز کھلاڑیوں کی تذلیل کی ہے۔

گوا سے ہی تعلق رکھنے والے بھارت کے سابق فٹ بال کھلاڑی مکی فرنینڈو نے مجسمے کی تنصیب پر کہا کہ اس میں کوئی دو رائے نہیں کہ رونالڈو دنیائے فٹ بال کا بہترین کھلآڑی ہے۔

مکی فرنینڈو کے مطابق یہ عمل انتہائی افسوسناک ہے اس سے مقامی کھلاڑیوں میں احساس محرومی جنم لے گا۔
مکی فرنینڈو نے مزید کہا کہ اس کی جگہ مقامی کھلاڑی کا مجسمہ لگایا جاتا تو اس سے نئے اور نوجوان کھلاڑیوں کی حوصلہ افزائی ہوتی۔

 بی جے پی کے مقامی وزیر مائیکل لوہو نے اس تنازع پر کہا کہ ہم اپنے مقامی کھلاڑیوں کی حوصلہ افزائی میں کوئی کسر نہیں چھوڑیں گے ۔

وزیر کے مطابق کرسچیانو رونالڈو کا مجسمہ لگانے کی اصل وجہ بھی یہی ہے کہ مقامی نوجوان لڑکے اور لڑکیاں ان کے مجسمے کو دیکھ کر میدان میں ان جیسا بننے کی کوشش کریں۔