چوہدری محمد سرور نے کہا کہ عوام کو پینے کا صاف پانی فراہم کر نے کا وعدہ پورا کررہے ہیں۔

وزیر اعظم عمران خان سے گورنر پنجاب چوہدری محمد نے ملاقات کی جس میں سیاسی اور حکومتی امور سمیت دیگر ایشوز پر بات چیت کی گئی ، پنجاب میں بلدیاتی انتخابات اور ضمنی انتخاب بارے مشاورت بھی کی گئی۔

ذرائع کا کہنا ہے کہ ملاقات میں بعدازاں وزیراعلیٰ اور وفاقی وزیر شفقت محمود بھی شریک ہوئے ، پنجاب کے بلدیاتی انتخابات میں مضبوط امیدوار سامنے لانے کی حکمت عملی بنانے کا فیصلہ کیا گیا۔

 گورنر پنجاب چوہدری محمد سرور نے قومی صحت کارڈ کے وزیراعظم کے منصوبے کو سراہا ، یونیورسٹیز میں اصلاحات کے بارے بھی وزیر اعظم کو بتایا۔

ملاقات میں اورسیز پاکستانیوں کے مسائل اور انکے حل کے لیے اقدامات پر بات چیت کی گئی۔

چوہدری محمد سرور نے بریفنگ دیتے ہوئے بتایا کہ پنجاب آب پاک اتھارٹی کے 1500منصوبے مکمل ہو رہے ہیں ، عوام کو پینے کا صاف پانی فراہم کر نے کا وعدہ پورا کررہے ہیں۔

وزیر اعظم نے عوام کو پینے کا صاف پانی فراہم کرنے کے اقدامات مزید تیز کر نے کی ہدایت دی۔