لندن میوزیم کے مشہور ڈائنوسارکو کرسمس سویٹر پہنادیا گیا

Web Desk

07th Dec, 2021. 01:28 pm

لندن کے مشہور نیچرل ہسٹری میوزیم میں خونخوار ٹی ریکس ڈائنوسار کے مشینی ماڈل کو ایک بہت بڑا اور خاص الخاص سویٹر پہنایا گیا ہے۔ اسے برطانیہ میں جمپر کہا جاتا ہے جسے خاص عملے نے بہت توجہ سے تیار کیا ہے۔

یہ مشہور ڈائنوسار کئی پرزوں سے ملکر بنایا گیا ہے اور حرکت کرتا ہے ۔ اس کی تیاری میں ایک چھوٹی فرم سے مدد لی گئی ہے جسے ایک خاندان چلاتا ہے۔ اس سے قبل یہ ادارہ کئی مشہور شخصیات اور پارلیمینٹیریئن کے لیے کرسمس جمپر بنا چکا ہے۔

کمپنی کے سربراہ سناہل پٹیل کے مطابق ان کی کمپنی کا تیارکردہ یہ سب سے بڑا ڈیزائن بھی ہے جس میں پورے اسٹاف کو بہت محنت کرنا پڑی اور 100 گھنٹوں کے بعد سویٹر کی تیاری ممکن ہوئی ہے۔ اس طرح یہ کمپنی کا سب سے بڑا اور مشکل آرڈر بھی تھا۔

سناہل پٹیل نے بتایا کہ میرے والدین 40 برس سے اس کام سے وابستہ ہیں اورمیں ان کی اگلی نسل سے تعلق رکھتا ہوں لیکن پہلے ہم نے ایسا کام کبھی نہیں کیا تھا۔ یہ سب سے بڑا کام ہے جو ہم نے کیا ہے اور توقع ہے کہ مستقبل بھی میں یہی سلسلہ جاری رہے گا۔

یہ عام انسانی  سویٹر سے 12 گنا بھاری ہے اور اس کا چھوٹا سائز میوزیم کی دکان سے خریدا جاسکتا ہے۔ اس کا مقصد لوگوں کو تفریح کا موقع فراہم کرنا ہے کہ کیونکہ دنیا کی اکثریت کووڈ وبا کی وجہ سے پریشانی میں مبتلا ہے۔

Square Adsence 300X250