مقبوضہ مغربی کنارے میں اسرائیلی فوجی نے اپنے ہی دو افسران کو گولیاں مارکر ہلاک کردیا۔

غیر ملکی خبررساں ادارے کے مطابق مقبوضہ مغربی کنارے میں اسرائیل کے عسکری کیمپ کے اندر فوجی اہل کار نے گشت کے دوران غلطی سے اپنے ہی فوجی افسران پر گولیاں برسادیں جس کے نتیجے میں 2 اسرائیلی فوجی افسران ہلاک ہوگئے۔

اسرائیلی میڈیا نے بھی واقعے کی تصدیق کرتے ہوئے کہا کہ یہ واقعہ اسپیشل فورسز کے ایک یونٹ میں پیش آیا جہاں اسرائیلی فوجی نے فلسطینی حملہ آور سمجھ کر غلطی سے دونوں افسران پر فائرنگ کر دی۔

رپورٹ میں بتایا گیا کہ ہلاک ہونے والے دونوں افسران اپنی بیس کے باہر پیٹرولنگ پر تھے اس دوران انہیں ایک مشکوک شخص نظر آیا لیکن وہ جیسے ہی اس کے قریب پہنچے، اس نے اس خوف سے کہ دو فلسطینی ہتھیاروں سمیت مجھ پر حملہ آور ہونے والے ہیں، ان دونوں افسران پر فائرنگ کردی جس کے نتیجے میں وہ ہلاک ہوگئے۔

اسرائیلی فوجی ترجمان نے واقعے کی زیادہ تفصیلات نہیں بتائیں البتہ یہ بات سامنے آئی ہے کہ اسرائیلی فوجی اہلکار نے اپنے ہی افسران کی غلط شناخت کی اور انہیں فلسطینی سمجھ کر فائرنگ کردی۔ ہلاک ہونے والوں میں 28 سالہ میجر اوفیک ہارون اور 26 سالہ میجر اتمر الہار شامل ہیں۔

دوسری جانب اسرائیلی وزیردفاع کی جانب سے جاری ہونے والے بیان میں کہا گیا ہے کہ اسرائیلی فوجی کی غلطی سے دو افسران کی موت کی تحقیقات کی جارہی ہیں۔

اسرائیل کے ایک سینٹرل کمانڈ کے سربراہ بریگیڈیئر جنرل اوفر ونٹر نے کہا واقعے کو ’فینڈلی فائرنگ‘ قرار دیتے ہوئے کہا کہ یہ واقعہ فوجی مشقوں کے دوران پیش نہیں آیا اور نہ ہمارے کسی فوجی نے دوسرے فوجی کو جان بوجھ کر ہلاک کیا ہے بلکہ یہ واقعہ غلطی سے پیش آیا۔