پاکستان مسلم لیگ (ن) کے رہنما کیپٹن ریٹائرڈ صفدر کا کہنا ہے کہ بہت جلد الیکشن ہوں گے اور نواز شریف وزیراعظم بنیں گے۔

لاہور میں میڈیا سے بات کرتے ہوئے کیپٹن ریٹائرڈ صفدر نے کہا کہ ملک میں عام انتخابات بہت جلد ہونے والے ہیں اور ان انتخابات کے بعد نوازشریف ایک بار پھر پاکستان کے وزیراعظم بنیں گے۔

انہوں نے کہا کہ پاکستان ڈیموکریٹک موومنٹ (پی ڈی ایم) بہت جلد معاملات کو نئے انتخابات کی جانب لے جارہی ہے اور بہت جلد عام انتخابات کا اعلان ہوجائے گا۔

یہ بھی پڑھیں؛ ’چاہے کچھ بھی کر لیں نوازشریف واپس نہیں آئیں گے‘

کیپٹن ریٹائرڈ صفدر نے کراچی میں ایم کیو ایم کی جانب سے بلدیاتی قانون کے خلاف احتجاج کے دوران پولیس کی جانب سے خواتین پر لاٹھی چارج کی مذمت کی۔

اس سے قبل لاہور میں ہی میڈیا سے بات کرتے ہوئے وفاقی وزیر اطلاعات فواد چوہدری کا کہنا تھا کہ نوازشریف واپس آ نہیں رہے، انھیں لایا جارہا ہے اور شاہد خاقان نوازشریف کے خلاف عدم اعتماد لانا چاہتے ہیں۔

یہ بھی پڑھیں؛ نوازشریف کیلئےکوٹ لکھپت جیل میں نئےکمرے تیارکیےہیں، فواد چوہدری

دوسری جانب پی ٹی آئی حکومت کی اتحادی جماعت مسلم لیگ (ق) کے سربراہ چوہدری شجاعت حسین نے حکومت پر تنقید کرتے ہوئے کہا کہ وہ نوازشریف کی واپسی سے باہر نکلیں اور عوامی ایشوز کے حل پر توجہ دیں، چاہے کچھ بھی کر لیں نوازشریف واپس نہیں آئیں گے۔