حلیم عادل شیخ نے کہا ہے کہ علی بابا اور چالیس چوروں کا ٹولہ لوگوں کو گمراہ کررہا ہے۔

اپوزیشن لیڈر سندھ اسمبلی حلیم عادل شیخ نے میڈیا سے گفتگو کرتے ہوئے کہا ہے کہ سونے کی اینٹیں ماہویر کے گھر سے نکلی ہیں ، ایک ڈی ایم سی کے افسر سے اتنے پیسے نکل سکتے ہیں؟

انہوں نے کہا کہ ڈی ایم سی ایسٹ ، ڈی ایم سی کورنگی شفقت ممتاز آج بھی کلین ہے ، یہ فنانس ڈیپارٹمنٹ کا ملازم ہے ، جس کے وزیر وزیراعلیٰ ہیں ، ایک فنانس ڈیپارٹمنٹ کے ملازم کے گھر سے سونے کی اینٹیں نکل سکتی ہیں تو وزیر کے گھر سے تو سونے کی لانچیں نکلیں گی۔

حلیم عادل شیخ نے کہا ہے کہ یہ سب اختیار صوبے میں اپنے پاس رکھنا چاہتے ہیں ، اگر یہ اختیار لوکل کونسل کو ہوتا تو لوگ اس کو گریبان سے پکڑ لیتے ، جب تک یہ کالے قانون سے 21 شقیں نہیں نکالیں گے تو یہ قانون بہتر نہیں ہوگا۔

اپوزیشن لیڈر سندھ اسمبلی نے کہا ہے کہ یہ جو احتجاج ہورہا ہے کوئی پاگل نہیں ہے ، کوئی نہ کوئی مسئلہ تو ہے ، یہ ٹریکٹر غریبوں کے نام پر نکالے تھے ، راشن کے نام پر ٹریکٹر نکالے گئے ، اربوں روپے کے ٹریکٹر ہاری چلا رہے ہیں۔

انہوں نے کہا کہ ہاری کو گنے کا ریٹ نہیں مل رہا ہے ، ہم نے کسان کارڈ کا اجراء کیا ، ٹریکٹر اسکیم میں نیب میں کیسز ہیں ، ٹریکٹر ریلی میں لوگوں کے زخموں پر نمک چھڑکا گیا۔

حلیم عادل شیخ نے کہا ہے کہ ایکسپو سینٹر کے باہر لوگ احتجاج کررہے ہیں ، نو ماہ سے تنخواہ نہیں دی گئی ، سندھ کے لوگ ویکسین سے محروم ہیں۔