2021 میں واٹس ایپ کی سب سے بڑی حریف بن کر سامنے والی اپیلی کیشن ٹیلی گرام نے سال کے آخری دن مزید نئے اور دلچسپ فیچر جاری کردیے ہیں۔

ٹیلی گرام نے اپنے استعمال کنندگان کو نئے سال کا تحفہ دینے کے لیے آئی میسج طرز کے ری ایکشن کے ساتھ ساتھ ہائیڈ ٹیکسٹ اور میسج ٹرانسلیشن جیسے دیگر مفید فیچرز متعارف کرادیے ہیں۔

 میسج ری ایکشن

اس فیچر کی بدولت استعمال کنندگان ایموجیز کی مدد سے کسی بھی پیغام پر اپنا رد عمل دے سکیں گے۔ یہ فیچر اس سے قبل آئی فون کے آئی میسجز، فیس بک میسنجر اور انسٹا گرام میں شامل کیا جا چکا ہے۔

ٹیلی گرام پیغام میں اینی میٹڈ اور انٹر ایکٹو ایموجیز شامل کرنے والی پہلی میسیجنگ ایپ ہے۔ ٹیلی گرام نے آج ان ایموجیز میں سے کچھ کو ری ایکشن فیچر میں شامل کیا ہے تاکہ استعمال کنندہ کسی پیغام کے ساتھ اپنے احساسات اور فیڈ بیک دے سکیں۔

ٹیلی گرام کے یہ ری ایکشنز انفرادی، گروپ اور چینلز میں استعمال کیے جاسکتے ہیں۔ تاہم چینلز اور گروپ پر ایڈمن کو یہ اختیار حاصل ہوگا کہ وہ کس ری ایکشن کی اجازت دے اور کس کی نہیں۔

اسپوئلر

ٹیلی گرام کے اسپوئلر فیچر کی مدد سے استعمال کنندہ ٹائپنگ کے دوران اپنے پیغام کے کسی بھی حصے کو منتخب کرکے نئی’ اسپوئلر‘ سیٹنگ ترتیب دے سکتا ہے۔

اسپوئلر آپشن کو منتخب کرنے سے چیٹ میں سے آپ کا منتخب کردہ حصہ چھپ جائے گا۔

میسج ٹرانسلیشن

میسجنگ ایپلی کیشن  کےلیے ٹرانسلیشن کا فیچر نہایت اہمیت کا حامل ہے۔ خوش قسمتی سے ٹیلی گرام اس فیچر کو اپنی ایپ میں شامل کرنے والی پہلی میسجنگ ایپ بن گئی ہے۔

اس فیچر کی مدد سے استعمال کنندہ کسی بھی پیغام کا کسی دوسری زبان میں ترجمہ کرسکتا ہے۔

فیچر کو فعال کرنے کے لیے ایپ کی سیٹنگز میں جاکر ’ زبان ‘ منتخب کریں۔ جب آپ پیغام کو منتخب کریں گے تو متن کے خانے میں نیا ’ ٹرانسلیٹ‘ بٹن شامل ہوجائے گا۔

 ٹرانسلیشن کا فیچر تمام اینڈروئیڈ ڈیوائسز کو سپورٹ کرتا ہے تام ایپل ڈیوائسز کے لیے ان آئی او ایس 15 یااس سے اوپر کے آپرٹنگ سسٹم پر اپ ڈیٹ کرنا لازم ہوگا۔ جب کہ ترجمے کے لیے دست یاب زبانوں کی فہرست آپ کے فون کے آپریٹنگ سسٹم پر منحصر ہے۔