مولانا فضل الرحمان نے کہا ہے کہ عمران خان عالمی طاقتوں کا مہرہ ہے۔

پی ڈی ایم کے سربراہ مولانا فضل الرحمان نے جے یو آئی کے مرکزی رہنماؤں اسلم غوری ، مولانا امجد خان ، مولانا راشد محمود سومرو اور مفتی ابرار احمد خان  سے گفتگو کرتے  ہوئے کہا ہے کہ فارن فنڈنگ کیس کی سیکورٹنی کمیٹی کی رپورٹ ہم سب کے لئے چشم کشا ہے۔

انہوں نے کہا کہ عمران خان نے الیکشن کمشن سے 53 اکاؤنٹس کو چھپایا ، بیرون ممالک سے کئی مشتبہ اداروں اور افراد کی طرف سے پی ٹی آئی کو فنڈنگ کی جا رہی تھی ، رپورٹ میں اس فنڈنگ میں خردبرد کے اشارے بھی انتہائی خطرناک رجحانات کی نشاندہی کرتے ہیں۔

پی ڈی ایم کے سربراہ نے کہا کہ غیرملکی قوتوں نے پی ٹی آئی کو بھاری مالی معاونت دی عمران اب  انہی قوتوں کے مفادات کے تحفظ میں مصروف ہے ، پہلے اس اہم مقدمے کو نمٹانے میں غیرمعمولی تاخیر نے کئی شکوک و شبہات پیدا کئے۔

مولانا فضل الرحمان نے کہا کہ پی ٹی آئی کے اساسی رکن اکبر ایس بابر کے الزامات درست تھے ، پی ٹی آئی کے اکبر ایس بابر کی حب الوطنی اور ثابت قدمی کے معترف ہیں ، اپنے ملک سے وفاداری اور پی ٹی آئی کے کارکنوں  کی درست رہنمائی کا فریضہ نہایت دلیری اور جانفشانی سے ادا کیا۔

انہوں نے کہا کہ وقت نے ہمارے موقف کو درست ثابت کر دیا کہ عمران خان عالمی طاقتوں کا مہرہ ہے ، اسے ملکی سلامتی اور مسلم قوم کے مفادات سے کوئی سروکار نہیں ، ان کا ساڑھے تین سالہ دور اس قوم کے مستقبل پہ تباہ کن اثرات ڈال گیا۔

مولانا فضل الرحمن نے کہا کہ اب سوال یہ ہے کہ ملکی اداروں کو بھی قومی سلامتی کو درپیش خطرات بارے سنجیدگی سے سوچنا چاہیے ، قوم کو بتایا جائے مغرب و مشرق کے کن افراد اور کن تنظیموں نے پی ٹی آئی کو مالی مدد دیکر کون کون سے مقاصد حاصل کئے۔