شہرِ قائد کراچی میں ابرِ کرم برسنے کو تیار ہے، محکمہ موسمیات نے شہر بھر میں ہلکی اور تیز بارش کی پیش گوئی کی ہے۔

ڈائریکٹر محکمہ موسمیات سردار سرفراز کے مطابق بادل برسانے والا سسٹم 4 جنوری کی شام شہر کی حدود ممیں داخل ہوگا اور 5 جنوری کو شہر کے مختلف علاقوں میں بارش کا امکان ہے۔

سردار سرفراز کے مطابق 6 جنوری کی صبح اور دوپہر میں بھی شہر کے مختلف علاقوں میں بارش کا امکان ہے۔

ڈائریکٹر محکمہ موسمیات کا کہنا ہے کہ منگل سے شروع ہونے والے سسٹم کے تحت پورے شہرمیں ہلکی اور تیز بارش کا امکان ہے۔

واضح رہے کہ ملک کے دیگر حصوں میں داخل ہونے والے مغربی ہواؤں کے سلسلے کے باعث پیر سے بیشتر علاقوں میں بارشوں کا نیا سلسلہ شروع ہونے کا امکان ہے۔

بارش برسانے والا یہ سسٹم ملک کے مغربی اور بالائی علاقوں میں داخل ہوا ہے، جو اکثر علاقوں میں ہلکی اور تیز بارشوں کا سبب بن سکتا ہے۔

بارشوں کا یہ سلسلہ ممکنہ طور پر سات جنوری تک وقفے وقفے سے جاری رہ سکتا ہے۔

مغربی ہواؤں کی وجہ سے کوئٹہ سمیت بلوچستان کے اکثر علاقوں میں تیز بارش برسنے کا امکان ہے۔

بارش کے باعث سبی ، بولان ، قلات، خضدار، نصیر آباد، کوہلو اور کوہ سلیمان کے برساتی ندی نالوں میں طغیانی کا خدشہ بھی ظاہر کیا گیا ہے۔