وفاقی وزیر فوڈ سیکیورٹی اینڈ ریسرچ سید فخر امام نے کہا ہے کہ حالیہ بارشیں گندم کیلئے مفید ہیں مگر پیداوار میں کمی کا خدشہ ہے۔

سید فخر امام نے میڈیا سے گفتگو کرتے ہوئے کہا کہ کوئی شک نہیں کہ پنجاب میں کھاد کا بحران موجود ہے، بہت سے شہروں میں کسانوں کی لمبی لمبی قطاریں نظر آرہی ہیں، کھاد وافر مقدار میں موجود ہے۔

  انہوں نے کہا کہ پنجاب میں زخیرہ اندوزوں کے خلاف مقدمات بھی درج ہوئے، حالیہ بارشیں گندم کیلئے مفید ہیں مگر پیداوار میں کمی کا خدشہ ہے۔

وفاقی وزیر نے سانحہ مری سے متعلق گفتگو کرتے ہوئے کہا کہ سانحہ مری بہت افسوسناک ہے اس کی تحقیقات ہو رہی ہیں، وزیر اعظم نے تحقیقاتی کمیٹی بنا دی ، ذمہ داروں کے خلاف کارروائی ہوگئی۔

ان کا کہنا تھا کہ جتنی گاڑیاں مری میں داخل ہوگئیں تھی اتنی نہیں ہونی چاہیے تھی، مری میں برف کا طوفان تھا اموات اللہ کی طرف سے ہوئیں، ہمارے اداروں میں شاید اتنی کوآرڈینیشن نہیں اس لیے ایسے حادثات ہوجاتے ہیں۔

وفاقی وزیر فوڈ سیکیورٹی اینڈ ریسرچ سید فخر امام نے مزید کہا کہ بلوچستان میں کھاد اسمگلر پکڑے گئے ہیں، گزشتہ سال ہماری بیشتر فصلوں میں ریکارڈ پیداوار ہوئی، کسانوں کو مشکلات ہیں ابھی جلد دور ہوجائیں گئی۔