علی زیدی نے کہا ہے کہ سندھ کے عوام بلاول کو بتا دیں گے کہ وہ کس کے ساتھ ہیں۔

پی ٹی آئی سندھ کے صدر و وفاقی وزیر علی زیدی نے بلاول زرداری کی تقریر پر رد عمل دیتے ہوئے کہا کہ بلاول زرداری کسانوں کا استحصال کر کے خود مگر مچھ کے آنسو بہا رہے ہیں۔

انہوں نے کہا کہ وفاقی حکومت ہمیشہ کسانوں کے ساتھ کھڑی رہی ہے، سندھ کے عوام کو سالوں سے گمراہ کرنے والی پیپلز پارٹی کے ہاتھ اب کچھ نہیں آئے گا۔

علی زیدی کا کہنا تھا کہ کسان کسی نومولود سیاستدان کے بہکاوے میں نہیں آنے والے، پی پی نے کسانوں کا پانی روک کر ہمیشہ پنجاب پر الزام تراشی کی ہے۔ احتجاج سے پہلے بلاول یہ بتائیں کہ یوریا زخیرہ کرنے والوں کے خلاف کیا کارروائی کی گئی ہے؟

پی ٹی آئی سندھ کے صدر نے کہا کہ ٹڈی دل کے معاملے میں بھی سندھ حکومت نے صرف سیاست کی تھی، وفاقی حکومت کے اقدامات کی بدولت ٹڈی دل پر قابو پایا گیا تھا۔

انہوں نے کہا کہ سندھ کے لوگ اب جاگ چکے ہیں اور زرداری مافیا سے نجات کے لیے پی ٹی آئی کے ساتھ ہیں، سندھ کی اینٹ سے اینٹ بجانے والوں کا ہر محاذ پر مقابلہ کریں گے۔

علی زیدی کا کہنا تھا کہ بلاول وفاقی حکومت گرانے سے پہلے اپنی ڈوبتی ہوئی سندھ حکومت کو بچائیں۔

پی ٹی آئی سندھ کے صدر و وفاقی وزیر علی زیدی کا مزید کہنا تھا کہ بلاول زرداری شوق سے اسلام آباد کی طرف مارچ کریں، پی ٹی آئی بھی اسی دن گھوٹکی سے کراچی مارچ کرنے جارہی ہے، سندھ کے عوام بلاول کو بتا دیں گے کہ وہ کس کے ساتھ ہیں۔