برطانیہ میں اود بلاؤ نان اسٹک ساس پین اور غذائی پیکنگ میں استعمال ہونے والے زہریلے کیمکل کا شکار ہورہے ہیں۔

اس بات کا انکشاف کارڈیف یونیورسٹی میں ہونے والی ایک تحقیق کے بعد ہوا جس کے مطابق انگلینڈ اور ویلز میں موجود اود بلاؤ PAFASs نامی کیمیکل سے متاثر ہو رہے ہیں۔

اس تحقیق کی سربراہی کرنے والی ڈاکٹر ایملی او رورکے کا اس بارے میں کہنا ہے کہ PAFASs کیمیکل کو ساس پین اور پیکیجنگ کے علاوہ واٹر پروف کپڑوں، داغ سے محفوظ  رکھنے والی مصنوعات اور آگ بجھانے والے آلات میں بھی استعمال کیا جاتا ہے۔

انسانوں میں اس کیمیکل کا ایکسپوژر حمل کے دوران پیچیدگیوں، جگر کے امراض، کینسر اور دیگر بیماریوں کا سبب بنتا ہے۔ ڈنمارک نے حال ہی فوڈ پیکیجنگ میں اس کیمکل کے استعمال پر پابندی عائد کردی ہے۔

ریسرچرز کا کہنا ہے کہ اود بلاؤ میں اس کیمکل کی موجودگی برطانیہ میں ماحولیاتی آلودگی کی شرح میں اضافے کی طرف نشان دہی کرتی ہے۔

مصنوعات میں موجود یہ کیمکل جھڑ کر سیوریج لائنوں کے ذریعے دریاؤں اور آبی ذخائر میں شامل ہورہا ہے۔ جس سے نہ صرف اود بلاؤ بلکہ دیگر زمینی اور سمندری حیات کو بھی خطرات لاحق ہورہے ہیں۔

تحقیق سے یہ بات بھی سامنے آئی کہ 80 فیصد اود بلاؤ کے جگر میں کم از کم 12 مختلف اقسام کے کیمیکل پائے گئے ہیں جن سے ان کی شرح اموات میں بھی اضافہ ہورہا ہے۔