امریکا کے سب سے بڑے اور معتبر نیلام گھرSotheby نے دنیا کے سب سے بڑے سیاہ ہیرے کو کرپٹوکرنسی میں نیلامی کے لیے پیش کرنے کا اعلان کردیا۔ 

دنیا بھر میں کرپٹو کرنسی کی مقبولیت میں اضافہ ہوتا جا رہا ہے اور بیش تر ممالک نے کرپٹو کرنسی میں لین دین کا آغاز بھی کر دیا ہے ۔ جب کہ گزشتہ ماہ ہی فیس بک اور واٹس ایپ جیسی مقبول ایپلی کیشن کی مالک کمپنی میٹا نے اپنے ڈیجیٹل وائلٹ Novi کے ذریعے امریکا میں ادائیگیوں کے لیے کرپٹو کرنسی کا اضافہ کرنے کا اعلان بھی کیا تھا۔

امریکا کے مشہور زمانہ نیلام گھر Sotheby’sنے بھی نیلامی میں ادائیگیوں کے لیے کرپٹو کرنسی وصول کرنے کا اعلان کردیا ہے۔

اعلامیے کے مطابق فروری میں نیلامی کے لیے پیش کیے جانے والے دنیا کے سب سے بڑے سیاہ ہیرے ’ دی انیگما‘ کو قیمت سے قطع نظر سب سے زیادہ بولی دینے والے فرد کو نیلام کر دیا جائے گا اور اسے خریدنے والا فرد ادائیگی کے لیے کرپٹو کرنسی بھی دے سکتاہے۔

555اعشاریہ 55 قیراط وزنی اس ہیرے کو اس سے قبل نہ ہی کبھی عوام کے سامنے پیش کیا گیا اور نہ ہی اب تک فروخت کیا۔ یہ سیاہ ہیرا Sotheby’s کے نوادر میں گزشتہ 20 سال سے موجود تھا۔

نیلام گھر انتظامیہ کا کہنا ہے کہ آج کی مارکیٹ کے لحاظ سے ہمیں توقع ہے کہ یہ نایاب ہیرا 41 لاکھ سے 68 لاکھ ڈالر کے درمیان کسی قیمت پر فروخت ہوگا۔

گینیز بک آف ورلڈ ریکارڈ کے مطابق اس ہیرے کو دنیا کے سب سے ہیرے کا اعزاز حاصل ہے ۔ تین فروری سے شروع ہونے والی آن لائن نیلامی میں اس سیاہ ہیرے کو پہلی بار دبئی، لاس اینجلس اور لندن میں نمائش کے لیے پیش کیا جائے گا۔