متحدہ عرب امارات کی ایک فوجداری عدالت نے ایشیائی خاتون اور اس کے شوہر کو مار پیٹ کے جرم میں 6 ماہ کی سزا سنانے کے ساتھ ملک بدری کا حکم بھی دے دیا۔

غیر ملکی خبر رساں ادارے کے مطابق یو اے ای کی فوجداری عدالت میں ایک ایشیائی جوڑے کا کیس آیا جس میں دونوں کے درمیان تلخ کلامی کے بعد لڑائی بھی ہوئی تھی۔

25 سالہ ایشیائی خاتون نے حکام کو بتایا کہ میرے شوہر نے دوسری شادی کا ارادہ ظاہر کیا حالانکہ وہ میرا حق بھی پورا ادا نہیں کرتا لیکن دوسرے شادی کے موضوع پر ہمارے درمیان تلخ کلامی ہوئی جس پر میرے شوہر نے مجھے زور دار تھپڑ مارا جس سے میری قوت سماعت 2 فیصد تک متاثر ہوگئی۔

اس حوالے سے 24 سالہ شوہر نے عدالت کو بتایا کہ میں نے خود بیوی کو اپنے فیصلے سے آگاہ کیا لیکن اس نے میرے فیصلے کو ماننے سے انکار کردیا اور لڑائی شروع کردی۔

یہ بھی پڑھیں؛ بیوی کا نیند میں بڑبڑا کر جرم کا اعتراف، شوہر نے مقدمہ کردیا

شوہر کے مطابق میری بیوی نے مار پیٹ خود شروع کی اور پھر میرے دائیں ہاتھ کی انگلیوں کو اتنی زور سے مروڑا کو وہ ٹوٹ گئیں۔

بیوی کی میڈیکل رپورٹ میں تشدد کے نشانات بھی واضح طور پر دکھائی دیے ہیں جس میں اس کے چہرے سمیت ، ناک ، کان ، گردن اور سینے پر بھی نشانات پائے گئے ہیں جب کہ شوہر کی میڈیکل رپورٹ سے دائیں ہاتھ کی چوتھی اور پانچویں انگلی میں فریکچر کی تصدیق ہوگئی ہے۔

بعد ازاں عدالت نے معاملے کی تحقیقات کے بعد ایشیائی خاتون اور اس کے شوہر کو مار پیٹ کے جرم میں 6 ماہ کی سزا کے ساتھ ساتھ ملک بدر کرنے کے احکامات بھی جاری کردیے۔