قدرت کے کارخانے میں بعض حشرات اتنے خوبصورت ہیں کہ ان سے نظر ہٹانے کا جی نہیں کرتا۔ ایسی ہی ایک شوخ اور پچرنگی مکڑی، چمپنگ اسپائیڈر بھی ہے لیکن کیا کیجئے کہ یہ خود بہت سارے رنگ دیکھنے سے قاصر ہے۔

 امریکا کی جامعہ سنسناٹی نے چمپنگ اسپائیڈر قبیلے کی ایک مکڑی پر تحقیق کی ہے۔ اس کا حیاتیاتی نام سائٹس بربائپس ہے جو یورپ اور شمالی افریقہ میں عام پائی جاتی ہے۔

یونیورسٹی کے سائنسداں پروفیسر ڈیوڈ اوٹومور نے لکھا کہ ہم سمجھتے تھے کہ یہ اپنے رنگوں سے دوسری مکڑی سے رابطہ کرتی ہے یا اسے لبھاتی ہے لیکن اب معلوم ہوا کہ یہ ان رنگوں کو دیکھ ہی نہیں سکتی۔ اس کی جلد مخملی اور ٹانگیں اور سر شوخ سرخ اور دیگر رنگوں کے ہیں۔

ماہرین نے سلووینیا سے اس مکڑی کے درجنوں نمونے لئے اور ان کی آنکھوں کا آپریشن کرڈالا۔ معلوم ہوا کہ اس کی آنکھوں میں سرخ رنگت اور اس کے شیڈ محسوس کرنے والے فوٹو ریسپٹر یا خلیات ہی موجود نہیں ۔ ماہرین نے اس کی تصدیق کے لیے مائیکرواسپیکٹروفوٹومیٹری ٹیکنالوجی استعمال کی ہے۔

سائنسدانوں کے مطابق اس راز سے ابھی پردہ اٹھنا باقی ہے۔ کیونکہ شوخ رنگوں والےنر پرندے اپنی ہی مخالف جنس کو لبھانے کے لیے ان رنگوں کو استعمال کرتے ہیں۔ یہ نر مکڑی بھی اچھل کر رقص تو کرتی ہے لیکن اپنا شوخ رنگ کسے دکھائے کیونکہ سامنے موجود مادہ اسے نہیں دیکھ سکتی۔

اب صرف یہی صورت رہ جاتی ہے کہ نر مکڑا اپنے شوخ رنگ سے خود کو دشمن سے بچانے کا کام کرتا ہے۔