فیڈرل بورڈ آف ریوینیو (ایف بی آر) کی جانب سے ایکسچینج کمپنیوں کو اچانک 2016 میں واپس لیے گئے وِد ہولڈنگ ٹیکس کی اربوں روپے کے ادائیگی کے نوٹسز جاری کردئیے گئے ہیں، جس کے بعد ڈالر 200 روپے سے بھی تجاوز کرنے کا خدشہ پیدا ہوگیا ہے۔
ایکسچینج کمپنیوں کے نمائندوں کے مطابق ایف بی آر نے انہیں اُس ود ہولڈنگ ٹیکس کی عدم ادائیگی پر نوٹس جاری کیے ہیں جو 2016 میں واپس لے لیا گیا تھا۔
اچانک موصول ہونےوالے ٹیکس نوٹسز نے ایکسچینج کمپنیوں میں افراتفری پیدا کردی ہے۔
ایکسچینج کمپنیوں کے نمائندوں کا کہنا ہے ود ہولدںگ ٹیکس کی اضافی قیمت صارفین کو منتقل کی جائے گی جس سے ڈالر کی قیمت 200 روپے سے اوپر جاسکتی ہے۔
ایکسچینج کمپنیز ایسوسی ایشن آف پاکستان کے چیئرمین ملک بوستان کا اس حوالے سے کہنا ہے کہ ایکسچینج کمپنیاں 16 فیصد ود ہولڈنگ ٹیکس کا بوجھ صارفین کو منتقل کردیں گی جنہیں ایک ڈالر پر 20 روپے سے زائد کا اضافی بوجھ برداشت کرنا پڑے گا، جس کے نتیجے میں ڈالر کا ایکسچینج ریٹ 200 روپے یا اس سے بھی زیادہ ہوسکتا ہے۔
ملک بوستان نے کہا کہ ایکسچینج ریٹ پر بہت دباؤ ہے اور روپے کی قدر کم ہونے پر حکومت کو پہلے ہی تنقید کا سامنا ہے، یہ حکومت کے خلاف سازش لگتی ہے۔
ملک بوستان کے مطابق اگر ڈالر 200 تک پہنچتا ہے تو ایکسچینج کمپنیوں کے قانونی کاروبار کی جگہ بلیک مارکیٹ لے لے گی۔
ایک ”اے“ کیٹیگری کی ایکسچینج کمپنی نے شناخت ظاہر نہ کرنے کی شرط پر انگریزی جریدے کو ایف بی آر کی جانب سے موصول نوٹس دکھایا جس میں ود ہولڈنگ ٹیکس کی مد میں ایک ارب روپے سے زیادہ کی رقم طلب کی گئی ہے۔
ایکسچینج کمپنی نے کہا کہ وہ یہ بوجھ کرنسی مارکیٹ کو منتقل کردے گی اور ڈالر کی قیمت آسمان سے باتیں کرتی نظر آئے گی۔
ملک بوستان نے اپنے بیان میں کہا کہ اس وقت ود ہولڈنگ ٹیکس کا نفاذ سمجھ سے بالاتر ہے، جبکہ مارکیٹ پہلے ہی غیر مستحکم اور حکومت دباؤ میں ہے۔
انہوں نے کہا کہ ہم نے چیئرمین ایف بی آر سے ہونے والی ملاقات میں انہیں 16 فیصد ود ہولڈنگ ٹیکس کے نتائج کے بارے میں بتایا تھا۔
انہوں نے بتایا کہ چیئرمین ایف بی آر نے ایکسچینج کمپنیوں کو یقین دلایا تھا کہ نوٹس واپس لے لیے جائیں گے اور کمپنیوں کو ٹیکس افسران کی جانب سے کسی قسم کی ہراسانی کا سامنا نہیں کرنا پڑے گا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News