عدالت نے پارک لین اورمنی لانڈرنگ ریفرنسز میں آصف زرداری، فریال تالپوراور دیگر کی ایک روزہ عدالتی حاضری سے استثنی کی درخواستیں منظور کر لیں۔ 

تفصیلات کے مطابق احتساب عدالت اسلام آباد میں جعلی اکاؤنٹس سے جڑے پارک لین اور منی لانڈرنگ ریفرنسز کی سماعتیں ہوئیں۔

سابق صدر آصف زرداری ، فریال تالپور اور دیگر کی جانب سے ایک روزہ عدالتی حاضری سے استثنی کی درخواستیں دی گئیں۔

آصف زرداری کے وکیل بیرسٹر شیراز راجپر عدالت کے روبرو پیش ہوئے۔

نیب پراسیکیوٹر عثمان مرزا کے رخصت ہونے کے باعث سماعت بنا کارروائی کے ملتوی کر دی گئی۔

عدالت نے سابق صدر آصف زرداری، فریال تالپور اور دیگر کی ایک روزہ عدالتی حاضری سے استثنی کی درخواستیں منظور کرتے ہوئے ریفرنسز پر مزید کارروائی 14 مارچ تک ملتوی۔

احتساب عدالت کے جج اعظم خان نے ریفرنسز کی سماعتیں کی۔

دوسری جانب احتساب عدالت اسلام آباد میں متبادل توانائی بورڈ کے کنسلٹنٹ کی غیر قانونی تعیناتی کے ریفرنس سے متعلق بھی سماعت ہوئی۔

سابق وزیر اعظم شوکت عزیز کے شریک ملزمان پر فرد جرم کی کارروائی پھر مؤخر ہوگئی۔

وکیل صفائی نے استدعا کی کہ ہائی کورٹ میں درخواست دائر ہے فیصلہ آنے تک سماعت ملتوی کی جائے جس پر عدالت نے استدعا منظور کرتے ہوئے سماعت 22 مارچ تک ملتوی کر دی۔

ریفرنس میں شوکت عزیر، لیاقت جتوئی و دیگر ملزم نامزد ہیں۔

عدالت نے شوکت عزیز کو اشتہاری قرار دے رکھا ہے جبکہ ملزمان پر بشارت حسن بشیر کو غیر قانونی کنسلٹنٹ تعینات کرنے کا الزام ہے۔