بھارت کے سابق کھلاڑی محمد کیف نے آئی پی ایل کی میگا آکشن کے حوالے سے اپنی پیشن گوئی کر دی ہے۔

آئی پی ایل کے 15 سیزن کے لئے ہفتے کے دن میگا آکشن ہو گا جو دو دن جاری رہے گا، فرنچائزز اپنی ٹیم کے لئے بہترین کھلاڑیوں کے حصول کے لئے پیسہ پانی کی طرح بہائیں گے۔

انڈین آئی پی ایل کا یہ میگا آکشن 12 اور 13 فروری کو آئی ٹی حب بنگلور میں ہو گا۔

محمد کیف نے ایک ویب سائٹ کو انٹرویو دیتے ہوئے بتایا کہ آکشن کے دوران ابتدائی 10 سے 15 کھلاڑی لیگ کے مہنگے ترین کھلاڑی شمار ہوں گے۔

محمد کیف نے کہا کہ عالمی کرکٹ کے بڑے نام نیلامی کے بعد کے مرحلے میں دستیاب ہوں گے اور آکشن کے شروع میں فرنچائز کو اپنی ٹیم کا بینادی ڈھانچہ بنانے کی جستجو ہو گی۔

اس لئے فرنچائز اچھے کھلاڑیوں کے لئے بڑی رقمیں لگائیں گے۔ اور وہ بڑے کھلاڑی جو زیادہ معاوضوں کی امید لگا کر بیٹھے ہیں انہیں مایوسی کا سامنا کرنا پڑ سکتا۔

بھارتی ریاست اُترپردیش سے تعلق رکھنے والے سابق کھلاڑی محمد کیف نے کہا انڈین اوپنر شیکھر دھون اور آسٹریلین سپر اسٹار ڈیوڈ وارنر ممکنہ طور پر بھاری معاوضہ لینے میں کامیاب ہو سکتے ہیں۔

محمد کیف نے جنوبی افریقہ کے کوئنٹن ڈی کوک اور کاگیسو رباڈا کو بھی بھاری معاوضہ ملنے کی پیشن گوئی کی ہے۔