پاک فوج اور سعودی لینڈ فورسز کی مشترکہ تربیتی مشقوں کا ملتان میں آغازہوگیا، جوائنٹ میکنائز ٹریننگ کا سلسلہ 2 ماہ تک جاری رہے گا جس کے دوران مختلف نوعیت کی ڈرلز کی جائیں گی۔

پاک فوج کے شعبہ تعلقات عامہ (آئی ایس پی آر) کے مطابق پاکستان اور سعودی عرب کی فوجی مشقیں ملتان میں شروع ہو گئی ہیں، جوائنٹ میکنائز ٹریننگ کیلئے سعودی زمینی فوج کا دستہ ملتان گریژن پہنچا جہاں یہ دستہ 2 ماہ جاری رہنے والی میکنائزڈ ٹریننگ میں حصہ لے گا۔

مشقوں کی افتتاحی تقریب ملتان گریژن میں منعقد ہوئی، جنرل آفیسر کمانڈنگ میجر جنرل ظفر اقبال مروت افتتاحی تقریب کے مہمان خصوصی تھے۔

دونوں ممالک کے شریک دستے بھی افتتاحی تقریب میں شریک ہوئے، ان مشقوں میں مختلف نوعیت کی ڈرلز کی جائیں گی، مشترکہ تربیت کا مقصد ایک جامع پروگرام کے ذریعے صلاحیتوں اور مہارتوں کو بہتر کرنا ہے۔