پاکستان پیپلز پارٹی کے سیکرٹری جنرل نیر بخاری نے کہا کہ  سلیکٹڈ حکومت کے دن اب گنے جا چکے ہیں۔

اپنے جاری کردہ بیان میں نیر بخاری نے کہا ہے کہ پیپلزپارٹی کی لانگ مارچ  سے متعلق پلان کو حتمی شکل دے دی گئی ہے۔

 نیر بخاری کا کہنا تھا کہ پیپلزپارٹی کا لانگ مارچ شیڈول کے مطابق  27 فروری کو شروع ہوگا، پیپلزپارٹی کا لانگ مارچ چیئرمین بلاول بھٹو کی قیادت میں مختلف شہروں سے ہوتا ہوا اسلام آباد کے مقام پر پہنچے گا۔

انہوں نے کہا کہ  8 مارچ کو اسلام آباد کے مقام پر ڈیرا ڈالا جائیگا، پیپلزپارٹی کو عوام کے حقوق کے لئے اور مہنگائی اور غربت کے خلاف دھرنا بھی دینا پڑا تو بھی تیاریاں مکمل ہیں۔

نیر بخاری نے کہا کہ اسلام آباد پہنچنے کے بعد چیئرمین پیپلزپارٹی بلاول بھٹو آگے کے لائحہ عمل کا اعلان کریں گے۔

انہوں نے مزید کہا کہ تحریک انصاف کی سلیکٹڈ حکومت کے دن اب گنے جا چکے ہیں،  حکومت کے اپنے ہی ارکان اپنی حکومت کی پالیسیوں سے ناخوش ہیں۔