فرخ حبیب نے کہا ہے کہ 5 گھنٹے گاڑی میں سفر کرنے والا 6 گھنٹے میں ائیرایمبولینس سے واپس بھی آسکتا ہے۔

وزیرمملکت فرخ حبیب نے بلاول ،زرداری و شہباز شریف کی ملاقات سے متعلق میڈیا سے گفتگو کرتے ہوئے کہا ہے کہ جس دن عالمی سطح کے وزرائے خارجہ پاکستان آرہے ہیں یہ اس دن احتجاج کرنا چاہتے ہیں۔

انہوں نے کہا کہ احتجاج کے لیے اور بہت دن ہیں، ان سے کہتا ہوں اس پر نظر ثانی کریں ، وزرائے خارجہ یہاں سے کوئی غلط تاثر لیکر نہ جائیں۔

فرخ حبیب نے کہا کہ آج شہباز شریف صاحب نے بلاول اور زرداری کو بلایا ہے ، ہمیں امید ہے کہ پیٹ پھاڑ کر زرداری صاحب سے لوٹا ہوا مال نکال لیا جائیگا ، شہباز شریف آج زرداری کو رائیونڈ کی سڑکوں پر گھسیٹیں گے۔

وزیرمملکت فرخ حبیب نے کہا کہ یہ ان کی سیاسی ڈرامہ بازیاں ہیں، اس سے قبل بھی ان لوگوں نے تیتر بٹیر کھائے ہیں مگر نکلا کچھ نہیں ، زرداری،بلاول اور شہباز نے دونوں ہاتھوں سے ملک کو لوٹا ہے۔

انہوں نے کہا کہ یہ چاہتے ہیں عمران خان ان کے راستے سے ہٹ جائے تاکہ ان کا احتساب نہ ہو ، عمران خان اب اور آئندہ پانچ سال بھی ادھر ہیں ، یہ جتنی مرضی ملاقاتیں کریں قلابازیاں لگائیں ان سے لوٹا مال نکلوایا جائے گا۔

فرخ حبیب نے کہا کہ میاں صاحب کو تنہائی کا سینڈرم نہیں جیل جانے کا خوف ہے ، ڈاکٹر نے کہا چہل قدمی کرنی ہے، میاں صاحب نے پانچ سو کلو میٹر کا سفر شروع کر دیا ، جو بندہ پانچ گھنٹے گاڑی میں سفر کرتا ہے وہ چھ گھنٹے میں ائیرایمبولینس سے واپس بھی آسکتا ہے۔