شہباز گل کا کہنا ہے کہ خانیوال واقعے میں ملوث تمام گناہگاروں کیخلاف قانون کے مطابق کارروائی کی جائے گی۔

وزیراعظم کے معاون خصوصی برائے سیاسی روابط ڈاکٹر شہباز گل نے سوشل میڈیا پر جاری اپنی ٹوئٹ میں کہاکہ خانیوال کے افسوسناک واقعے سے متعلق وزیراعظم عمران خان کی وزیراعلیٰ عثمان بزدار کے ساتھ تفصیلی بات ہوئی۔

خانیوال کے افسوسناک واقع کے متعلق وزیراعظم عمران خان کی وزیراعلی عثمان بزدار کے ساتھ تفصیلی بات ہوئی۔ وزیراعظم نے وزیراعلی پنجاب اور آئی جی پولیس کو ہدائیت کی ہے کہ اس کیس میں فوری اور سخت ایکشن لیا جائے۔تمام گناہگاروں پر قانون کے مطابق سخت کاروائی کی جائے۔

— Dr. Shahbaz GiLL (@SHABAZGIL) February 13, 2022

انہوں نے کہاکہ وزیراعظم نے وزیراعلیٰ پنجاب اور آئی جی پولیس کو ہدایت کی ہے کہ اس کیس میں فوری اور سخت ایکشن لیا جائے۔

وزیراعظم نے خانیوال واقعے کا نوٹس لے لیا

وزیراعظم عمران خان نے خانیوال واقعے کانوٹس لے لیا۔

وزیراعظم نےآئی جی پنجاب سےواقعےکی رپورٹ طلب کرلی اور ان کا کہنا ہےکہ آئی جی پنجاب ملزمان کے خلاف سخت ایکشن لیں۔

وزیراعظم عمران خان کا کہنا ہےکہ غفلت برتنے والے پولیس اہلکاروں کےخلاف بھی کارروائی کی جائے ۔

وزیراعظم نے سوشل میڈیا پر جاری اپنی ٹوئٹ میں بھی کہاکہ قانون ہاتھ میں لینےوالوں کومعاف نہیں کیاجائےگا، کسی کو قانون ہاتھ میں لینے کی اجازت نہیں دی جاسکتی، ایسے عناصر سے سختی سے نمٹا جائے گا۔

کسی فرد/گروہ کیجانب سے قانون ہاتھ میں لینے کی کوشش قطعاً گوارا نہیں کی جائے گی چنانچہ انبوہی تشدد (Mob lynchings) کو نہایت سختی سےکچلیں گے۔میں نےIG پنجاب سےمیاں چنوں واقعےکےذمہ داروں اور فرائض کی انجام دہی میں ناکام رہنےوالےپولیس اہلکاروں کیخلاف کارروائی کی تفصیلات طلب کی ہیں۔

— Imran Khan (@ImranKhanPTI) February 13, 2022

انہوں نے اپنی ٹوئٹ میں کہاکہ غفلت برتنےوالےپولیس اہلکاروں کےخلاف بھی کارروائی کی جائے، ہجوم کے ہاتھوں تشدد، قانون ہاتھ میں لینےپرسنجیدگی سے نمٹا جائے گا۔

خانیوال، مبینہ توہینِ مذہب کے الزام میں مشتعل ہجوم کے ہاتھوں ایک شخص ہلاک

پاکستان کے صوبہ پنجاب کے ضلع خانیوال میں مشتعل ہجوم نے ایک شخص کو مبینہ توہینِ مذہب کے نتیجے میں تشدد کرکے ہلاک کردیا۔

ضلع خانیوال کی پولیس اور ایڈیشنل آئی جی جنوبی پنجاب کے دفتر نے ہجوم کے ہاتھوں ایک شخص کے مارے جانے کی تصدیق کی ہے۔

ضلع خانیوال کے قصبے تلمبہ کے علاقے 17 موڑ کے مقامی افراد نے ہلاک ہونے والے شخص پر مبینہ توہینِ مذہب کا الزام عائد کیا۔