اسپیس ایکس کے بانی ایلون مسک نے جنگ سے متاثرہ یوکرین کواسٹارلنک کے ذریعے انٹرنیٹ کی فراہمی شروع کردی۔

اسٹارلنک سیٹلائیٹس سے منسلک ہونے کے لیے ایلون مسک کی جانب سے یوکرین کو روس سے جنگ کے دوران انٹرنیٹ سے منسلک رکھنے کے لیے ہزاروں کی تعداد میں اسٹار لنک کے ٹرمینلز( ڈش) اورطاقت وربیٹریاں بھی بھیجی گئیں ہیں۔

تاہم سیکیورٹی ماہرین نے خبردارکیا ہے کہ اسٹارلنکس کے ٹرمینلزکوکسی طریقے سے چھپا کراستعمال کیا جائے، کیوں کہ وہ جداگانہ شکل وصورت رکھتے ہیں۔

وگرنہ روس اسٹارلنک ڈش کو ایک اشارے کے طورپراستعمال کرتے ہوئے فضائی حملہ کرسکتا ہے۔

یوکرین میں روسی حملوں سے متاثرہ شہروں کے علاوہ یوکرینی افواج بھی اسٹارلنکس سیٹلائٹ انٹرنیٹ کوروسی ٹینکوں اوران کی پوزیشنزپرڈرون حملوں کے لیے استعمال کررہی ہیں۔

ایلون مسک نے بھی اسٹار لنک ٹرمینلز کی مخصوص شکل کو تسلیم کرتے ہوئے یوکرینی استعمال کنندگان سے درخواست کی ہے وہ انٹرنیٹ کنیکٹویٹی کے لیے فراہم کیے گئے آلات کو روسی فضائی حملوں سے بچانے کے لیے اینٹینے کے اوپرروشنی کا کیمو فلاج کریں۔

تاہم ماہرین نے کیمو فلاج کی تجویز کو احمقانہ قراردیتے ہوئے کہا ہے کہ ٹرمینلز کو کسی بھی شے سے ڈھکا نہیں جاسکتا کیوں کہ سیٹلائیٹس سے منسلک ہونے کے لیے آسمان اور ڈش کے درمیان کوئی رکاوٹ حائل نہیں ہونی چاہیے۔