ویسے تو میچ دیکھنے کے لیے گراونڈ آنے والے تماشائیوں کے پوسٹرز اور پلے کارڈز انتہائی دلچسپ ہوتے ہیں، لیکن کراچی ٹیسٹ میں ایک پوسٹر متنازع بن گیا ہے، جس کی وجہ سے خاتون پرستار کو ہراسانی کا مرتکب قرار دیا جارہا ہے۔

معروف پاکستانی فاسٹ باولر شاہین شاہ آفریدی کی ایک فین کا پوسٹر سوشل میڈیا پر وائرل ہورہا ہے۔

عموماً کیمرا مین خوبصورت خواتین تماشائی یا پھر دلچسپ پوسٹرز اور پلے کارڈز کی تلاش میں رہتے ہیں۔

اب کراچی ٹیسٹ میں خاتون مداح کا ایسا ہی ایک پوسٹر سوشل میڈیا صارفین کی توجہ کا مرکز بن گیا ہے۔

سوشل میڈیا پر وائرل تصویر میں دیکھا جاسکتا ہے کہ خاتون نے شاہین شاہ آفریدی کے لیے ایک پوسٹر اٹھا رکھا تھا، جس پر’’شاہین کیوٹو، اِدھر آؤ تمہیں سریلیک کھلاؤں‘‘ درج تھا۔

کچھ صارفین نے تو اس پیغام  کو مضحکہ خیز قرار دیا، لیکن کچھ نے اسے عالمی سطح پر پاکستانی فاسٹ بولر کی تضحیک قرار دیا۔

کچھ ایسے بھی تھے جنہوں نے پوسٹر پر درج تحریر پر غصے کا اظہار کرتے ہوئے خاتون تماشائی  کو ہراسانی کا مرتکب قرار دیا۔

سوشل میڈیا صارفدین میں سے ایک کا کہنا تھا کہ “اگر کسی مرد نے خاتون کھلاڑی کے لیے ایسا پوسٹر اٹھایا ہوتا تو اسے  تنقید کا نشانہ بنایا جاتا، لیکن خاتون تماشائی کو عورت ہونے کی وجہ سے بریت دیدی گئی۔”

رمشا حسن نامی ٹوئٹر صارف لکھتی ہیں، “چہرہ کیوں کٹا ہوا ہے۔ اگر لڑکے ایسا کرتے ہیں توانہیں  شرم دلائی جاتی ہے، ایسا اس خاتون کے ساتھ کیوں نہیں کیا جارہا؟”

جبکہ رِدا شاہد نے اسے ہراسانی قرار دیا۔

حمزہ خان خٹک کا کہنا تھا کہ “تصور کریں یہ کسی لڑکے نے ایک خاتون کرکٹر کے ساتھ کیا ہو، تو رویہ مختلف ہوگا۔”

راحت علی نے لکھا، “بہت بے عزتی  کی بات ہے۔ اگر خواتین کچھ کرتی ہیں تو ہنس کر ٹال دیا جاتا ہے لیکن اگرکسی  مرد نے  کسی خاتون کرکٹر کے ساتھ ایسا کیا ہوتا تو تمام مردوں کی توہین کی جاتی ہے۔ پاکستانیوں کے دوہرے معیارات۔”