عالمی سطح پر بڑھتی ہوئی مہنگائی نے دنیا کے امیرترین شخص ایلون مسک کوبھی مشکلات سے دوچار کردیا ہے۔

ایلون مسک کی کمپنی اسپیس ایکس کی جانب سے جاری ہونے والے بیان میں کہا گیا ہے کہ بڑھتےہوئے افراطِ زرکی وجہ سے اسٹارلنک کی خدمات کی قیمتوں میں اضافہ ناگزیرہوچکا ہے۔

اعلامیے کے مطابق دنیا بھرمیں تیزی سے بڑھتی ہوئی مہنگائی کے تناظرمیں اسپیس ایکس نے مئی 2022 سے اپنی سیٹلائٹ انٹرنیٹ کی ماہانہ سبسکرپشن فیس 99 ڈالرسے بڑھا کر110 ڈالرکرنے کا فیصلہ کیا ہے۔

مزید پڑھیں: اسپیس ایکس نے مزید اسٹار لنک سیٹلائٹ خلا میں بھیج دیے

کمپنی کی جانب سے سبسکرپشن اورڈش ہارویئرکی قیمتوں میں اضافے کی بابت صارفین کو بہ ذریعہ ای میل آگاہ بھی کردیا گیا ہے۔

اسپیس ایکس نے ماہانہ سبسکرپشن فیس کے علاوہ اسٹارلنک سیٹلائٹس سے جوڑنے والے ڈش اوردیگر ہارڈویئرکی قیمتوں میں بھی اضافہ کردیا ہے جس کے بعد نئے صارفین کو انٹرنیٹ سروسز حاصل کرنے کے لیے 100 ڈالرکی اضافی ادائیگی کرنی پڑے گی۔

اس سے قبل نئے کنیکشن کے لیے استعمال کنندگان کو 499 ڈالردے کراسٹا رلنک ڈش کو خریدنا پڑتا تھا تاہم اب اس کے لیے 599 ڈالرادا کرنے پڑیں گے۔

تاہم ایسے صارفین جوپہلے ہی آرڈرکرچکے ہیں جواب 499 کی جگہ 549 ڈالرادا کریں گے۔

یاد رہے کہ ایلون مسک نے اس ماہ کے آغاز میں کہا تھا کہ ’ حالیہ مہنگائی کی وجہ سے لاجسٹک اورخام مال کی قیمتوں میں بے تحاشا اضافہ ہوچکا ہے، اوراسپیس ایکس کی کوریج اور استعداد کارمیں اضافے کے لیے قیمتوں میں اضافہ کرنا ضروری ہوگیا ہے۔‘