وزیراعظم عمران خان نے کہا ہے کہ جنگ میں نہیں امن میں سب کا ساتھ دیں گے، ہم غیر جانب دار ہیں۔

ان خیالات کا اظہار انہوں نے میلسی میں جلسے سے خطاب کرتے ہوئے کیا۔ ان کا کہنا تھا کہ آپ نے بہت ساری چیزیں  مجھ سے مانگ لیں، لگتا ہے جو کام ان 74 سالوں میں نہیں ہوئےوہ آپ ایک سال میں کرانا چاہتے ہیں۔

انہوں نے کہا کہ ہم غیر جانب دار ہیں اور کسی سے بھی دشمنی نہیں چاہتے، ہماری سب سے دوستی ہے اور ہم کسی بلاک کا حصہ نہیں ہیں۔ کوشش کریں گے کہ یوکرین میں جنگ بند ہو کیونکہ ہم جنگ میں کسی کا ساتھ نہیں دیں گے، امن میں سب کا ساتھ دیں گے۔

وزیراعظم کا کہنا تھا کہ کوئی قانون اجازت نہیں دیتا کہ کسی ملک میں ڈرون حملہ کیا جائے، 2008 سے 2018 کے دوران ڈرون حملے ہوئے، ڈرون حملوں میں بے قصور لوگ مارے جاتے تھے۔

بتایا جائے جب سے میں وزیراعظم بنا ہوں کیا کوئی ڈرون حملہ ہوا؟ اگر کوئی ڈرون آیا تو ایئر فورس سے کہوں گا کہ وہ ڈرون نیچے گرا دو۔

عمران خان کا یہ بھی کہنا تھا کہ حکومت میں آئے تو ملک کا دیوالیہ ہوچکا تھا۔ کورونا کی وجہ سے بھی مہنگائی کا طوفان آیا لیکن ہم نے بہتر طریقے سے کورونا وائرس کے بحران سے اپنے ملک کو بچایا۔

وزیراعظم نے کہا کہ امریکہ میں 40 سال کے بعد سب سے زیادہ مہنگائی ہوئی ہے جبکہ ہم نے عوام پر مہنگائی کا بوجھ کم کرنے کی پوری کوشش کی۔

انہوں نے یہ بھی کہا کہ ایف بی آر نے ریکارڈ ٹیکس اکٹھا کیا، جتنا ٹیکس دیں گے  وہ سارا عوام پر بوجھ کم کرنے پر لگاؤں گا اور اگر یہ بھگوڑا جو لندن میں بیٹھا ہوا ہے اس کا پیسہ لے آیا تو پیٹرول اور ڈیزل کی قیمت آدھی کردوں گا۔

وزیراعظم کا کہنا تھا کہ نہ آج تک عمران خان کسی کے سامنے جھکا ہے اور جب تک زندہ ہوں میں اپنی قوم کو جھکنے نہیں دوں گا۔

عمران خان کا یہ بھی کہنا تھا کہ یورپی یونین کے سفیر نے پاکستان کو خط لکھا کہ روس کیخلاف بیان اور ووٹ دیں، یورپی یونین کے سفیر  سے پوچھتا ہوں کیا آپ نے بھارت کو بھی یہ خط لکھا تھا؟

انہوں نے کہا کہ دہشت گردی کے خلاف جنگ میں 80 ہزار پاکستانیوں نے قربانی دی جبکہ ملک کو 100ارب ڈالر سے زائد کا نقصان ہوا، پاکستان کو کیا ملا؟ یورپی یونین سے پوچھتا ہوں کیا آپ نے ہمارا شکریہ ادا کیا؟

 وزیراعظم نے یہ بھی کہا کہ ہمارے دور میں جتنا کسانوں کے پاس پیسہ آیا ماضی میں کبھی نہیں آیا، کسان خوشحال ہوگا تو پاکستان ترقی کرے گا۔

ان کا کہنا تھا کہ مکئی کی  فصل کی قیمت میں اضافے سے کسان کو بہت  فائدہ ہوا۔ ہم نے گندم  کی سپورٹ پرائس بڑھائی اور اب کسان کو کپاس کی دگنی قیمت مل رہی ہے،کسان کو 70 سے80 ہزار تک فائدہ ہوا ہے۔

عمران خان کا یہ بھی کہنا تھا کہ کھاد پوری دنیا میں کم ہوچکی ہے، کھاد کی فیکٹریوں کو بند نہیں ہونے دیا، چین سے مزیدایک لاکھ ٹن کھاد منگوائی ہے۔ عالمی منڈی سے 5گنا کم قیمت پر اپنے کسانوں کو کھاد دے رہے ہیں۔

وزیراعظم عمران خان کا مزید کہنا تھا کہ وفاقی حکومت نے فیصلہ کیا ہے کہ جنوبی پنجاب کیلئے 500ارب روپے مزید خرچ کریں گے جبکہ یہ فیصلہ بھی کیا ہے کہ قومی اسمبلی میں جنوبی پنجاب کیلئے ترمیم پیش کریں گے اور اب ہم دیکھیں گے کہ پیپلزپارٹی اور ن لیگ جنوبی  پنجاب صوبے کی حمایت کرینگے یا نہیں سب سامنے آجائے گا۔