حافظ حمداللہ نے کہا ہے کہ عمران نیازی کی عزت اسی میں ہے کہ مستعفی ہو جائے۔

ایم کیوایم کی حکومت سے علیحدگی اور موجودہ سیاسی صورتحال پر ترجمان پی ڈی ایم حافظ حمداللہ نے ردعمل دیتے ہوئے کہا کہ ایم کیو ایم کے باضابطہ طور پر اپوزیشن کے ساتھ آنے کے عمران نیازی عددی برتری کھو چکے ہیں۔

انہوں نے کہا کہ کپتان وزیراعظم نہیں رہے وہ قوم سے وزیراعظم کی حیثیت سےخطاب نہیں کرسکتے۔

ترجمان پی ڈی ایم کا کہنا تھا کہ صدر پاکستان کو چاہیے کہ وہ عمران نیازی کو اعتماد کا ووٹ لینے کا حکم کریں، عمران نیازی کی عزت اسی میں ہے کہ مستعفی ہو جائے۔

حافظ حمد اللہ کا یہ بھی کہنا تھا کہ نیازی سمیت کسی وزیر مشیر کو بھاگنے کا موقع نہیں ملنا چاہیے، عمران نیازی اور ان کی پوری ٹیم کا نام ای سی ایل میں ڈال دینا چاہیے۔

ترجمان پی ڈی ایم حافظ حمداللہ کا مزید کہنا تھا کہ چوہدری پرویز الٰہی کے بارے یہ شعر نذر کرتا ہوں، چوہدری پرویز الٰہی کی نذر اک شعر نہ خدا ملانہ وصال صنم نہ ادھر کے رہے نہ ادھر کے رہے۔

واضح رہے اس سے قبل ایم کیو ایم پاکستان نے حکومت کا ساتھ چھوڑ کر باضابطہ طور پر متحدہ اپوزیشن میں شمولیت کا اعلان کردیا ہے۔

اسلام آباد میں بلاول بھٹو زرداری ، شہباز شریف، مولانا فضل الرحمان اور اختر مینگل کے ہمراہ پریس کانفرنس کے دوران خالد مقبول صدیقی نے کہا تھا کہ آج ہم سب تاریخی موقع پر جمع ہیں، آج کا دن دعاوں کا دن ہے۔

خالد مقبول صدیقی نے کہا تھا کہ ہم نے اپنے تمام سیاسی مفادات پر پاکستان کے مفادات کو ترجیح دی ہے، ہمارا ذاتی اور جماعتی کوئی بھی مفاد شامل نہیں، ہمارے معاہدے کی ایک ایک شق پاکستان کے عوام کے لئے ہے۔

ایم کیو ایم کے کنوینر خالد مقبول صدیقی کا مزید کہنا تھا کہ کہ چاہتےہیں سیاسی اختلافات ختم کرکے آگے بڑھیں، امید کرتا ہوں کہ اب دعوؤں اور وعدوں سے آگے کام کریں گے۔