کچھ عرصے سے بالی ووڈ کی دلکش جوڑی عالیہ بھٹ اور رنبیر کپور کی شادی کی خبریں گردش کر رہی ہیں ،اس حوالے سے تازہ ترین خبر یہ ہے کہ ان کی شادی کی تاریخ کا اعلان کردیا گیا ہے۔

عالیہ بھٹ سے عنقریب شادی کے بندھن میں بندھنے والے رنبیر کپور کا نام ماضی میں  کئی حسین اداکاراؤں کے ساتھ لیا جاتا رہا ہے جن میں کترینہ کیف، دپیکا پڈوکون، ماہرہ خان اور سونم کپورشامل ہیں۔

اب بالآخر خوبصورت ڈمپل گرل عالیہ بھٹ نے ناصرف رنبیر کپور بلکہ ان کے خاندان والوں کا بھی دل جیت لیا ہے۔

رنبیر کپور اور دپیکا پڈوکون کی محبت کا اختتام  دھوکے پر ہوا۔ اس جوڑی کے درمیان معاشقے کا آغاز فلم ’بچنا اے حسینو!‘ کے سیٹ پر ہوا جس میں کئی طرح کے اتار چڑھاؤ آئے، خاص طور پر جب رنبیر کپور کی کترینہ کیف سے قربتیں بڑھنے لگیں۔

رنبیر کپور نے 2011 میں ایک انٹرویو کے دوران گفتگو کرتے ہوئے خود اعتراف کیا کہ  انہوں نے دپیکا پڈوکون کو دھوکہ دیا تھا۔

رنبیرکپور نے کہا کہ ہاں میں نے اپنی ناسمجھی، ناتجربہ کاری، بہکاوے میں آنے کی وجہ سے چیٹنگ کی۔

ان کا کہنا تھا کہ آپ کو اس وقت پتا چلتا ہے جب آپ سمجھدار ہو جاتے ہیں۔ اس وقت آپ اس بات کو زیادہ اہمیت دیتے ہیں کہ کسی تعلق میں رہنے اور کمیٹڈ ہونے کا مطلب کیا ہے۔

اس سے قبل دپیکا نے بھی 2010 میں رنبیر کپور پر’چیٹنگ‘ کے الزامات عائد کرتے ہوئے کہا تھا کہ ماضی میں میرا دل ٹوٹا۔ جب اس نے پہلی بار مجھ سے دھوکہ کیا تو میں سمجھی کہ اس تعلق میں یا مجھ میں کوئی مسئلہ ہے لیکن جب کوئی اسے اپنی عادت بنا لے تو اس کا مطلب یہ ہوتا کہ مسئلہ اسی میں ہے۔

دپیکا نے اپنے انٹرویو میں مزید بتایاکہ جب انہوں نے رنبیر کپور کو رنگے ہاتھوں پکڑا تو یہ ان کے لیے آگے بڑھنے کا لمحہ تھا۔