چینی وزارت خارجہ کا کہنا ہے کہ کراچی دھماکے میں ملوث دہشت گردوں کو قیمت چکانا پڑے گی۔

گزشتہ روز جامعہ کراچی میں ہونے والے دھماکے پر چینی وزارت خارجہ کی جانب سے بیان جاری کیا گیا ہے جس میں دھماکے کی شدید الفاظ میں مذمت کی گئی اور دھماکے میں ہلاک افراد کے اہل خانہ سے تعزیت اورہمدردی کا اظہار کیا گیا ۔

ترجمان چینی وزارت خارجہ کا کہنا تھا کہ کراچی میں چینی شہریوں کونشانہ بنانے والے دہشت گردوں کوقیمت چکانا پڑے گی اور چینی شہریوں کا خون رائیگاں نہیں جانا چاہئیے۔

یہ بھی پڑھیں؛ جامعہ کراچی میں گذشتہ روز ہونے والی دہشت گردی کی واردت کا مقدمہ درج

وزارت خارجہ کی جانب سے کہا گیا کہ چین کے اسسٹنٹ وزیرخارجہ نے چین میں پاکستان کے سفیرکو ہنگامی فون کال میں کراچی دھماکے پرشدید تشویش کا اظہار کرتے ہوئے دھماکے میں ملوث دہشت گردوں کی فوری گرفتاری اور پاکستان میں چینی شہریوں کی حفاظت یقینی بنانے کا مطالبہ کیا۔

دوسری جانب پاکستان میں چینی سفارخانے کی جانب سے بھی کراچی دھماکے کی مذمت کرتے ہوئے پاکستان میں چینی شہریوں کی سکیورٹی یقینی بنانےکے لیے مؤثر اقدامات کی درخواست کی گئی جس پر وزیراعظم شہباز شریف نے وزارت داخلہ کو چینی شہریوں کی سیکیورٹی بڑھانے کی ہدایت کردی۔

چینی سفارتخانے کی جانب سے جاری بیان میں کہا گیا کہ پاکستان مستقبل میں ایسے واقعات دوبارہ نہ ہونے کو یقینی بنائے اور انہیں روکنے کی ہرممکن کوشش کی جائے۔

واضح رہے کہ گزشتہ روز کراچی یونیورسٹی میں ہونے والے بم دھماکے میں 3 چینی شہریوں سمیت 4 افراد ہلاک اور دو چینی باشندوں سمیت 4 افراد زخمی ہوئے تھے جب کہ دھماکے کی ذمہ داری کالعدم بلوچ لبریشن آرمی نے قبول کی تھی۔