وزیراعظم عمران خان کی سابقہ اہلیہ ریحام خان نے سپریم کورٹ کے فیصلے پر اپنا رد عمل دیا ہے۔

سماجی رابطے کی ویب سائٹ پر ٹوئٹ کرتے ہوئے وزیراعظم عمران خان کی سابقہ اہلیہ ریحام خان نے وزیراعظم کے خلاف تحریک عدم اعتماد سے متعلق 3 اپریل کو قومی اسمبلی کے ڈپٹی اسپیکر قاسم سوری کی رولنگ سے متعلق سپریم کورٹ کے فیصلے پر اپنا رد عمل دیا۔

ریحام خان نے اپنی ٹوئٹ میں کہا کہ مجھے آج پاکستانی ہونے پر فخر محسوس ہورہا ہے، سپریم کورٹ نے آج نظریہ ضرورت کو دفن کردیا اور بلاشبہ عدلیہ ہماری ریڑھ کی ہڈی کی حیثیت رکھتی ہے۔

ایک اور ٹوئٹ میں ریحام خان نے سپریم کورٹ کے فیصلے پر خوشی کا اظہار کرتے ہوئے لکھا ’’ آج کی سحری میری طرف سے ہوگی‘‘۔

یہ بھی پڑھیں: ڈپٹی اسپیکر کی رولنگ آئین سے متصادم قرار، سپریم کورٹ نے اسمبلیاں بحال کردیں

واضح رہے کہ چیف جسٹس پاکستان عمرعطا بندیال کی سربراہی میں سپریم کورٹ کے پانچ رکنی بنچ نے تحریک عدم اعتماد پرڈپٹی اسپیکر کی رولنگ کے خلاف ازخود نوٹس کیس کا محفوظ فیصلہ سنایا۔

سپریم کورٹ کی جانب سے فیصلے میں کہا گیا کہ ڈپٹی اسپیکر کی 3 اپریل کی رولنگ آئین کے خلاف ہے لہذا عدالت اسے کالعدم قرار دیتے ہوئے اسمبلیاں بحال کرنے کا حکم دیتی ہے۔

سپریم کورٹ کی جانب سے سنائے گئے فیصلے میں کہا گیا کہ وزیراعظم اسمبلیاں تحلیل کرنے کے اہل نہیں تھے جب کہ عدالت نے صدر مملکت ڈاکٹر عارف علوی کے نگراں حکومت کے احکامات بھی کالعدم قرار دے دیے۔