کوک اسٹوڈیو کے سیزن 14 کی دوسری قسط میں بلوچی گانے “کنا یاری” سے شہرت پانے والے کیفی خلیل نے معروف شاعر امجد اسلام امجد کی شاعری کو ایک خوبصورت گانے میں ڈھال دیا ہے۔

ان کا نیا گانا “توصیف اور اردو میش اپ“ ہے، جس کی عمدہ شاعری امجد اسلام امجد اور بسمل سعیدی کے کلام سے لی گئی ہے۔

بلوچ گلوکارہ ایوا بی کے ساتھ پرفارمنس دینے والے کیفی خلیل کے گانے  کنا یاری کو یو ٹیوب پر دو مہینے میں ڈیڑھ کروڑ سے زائد ویوز مل چکے ہیں۔

کیفی بلوچ نوجوان گلوکار ہیں اور ان کی آواز نہایت سحر انگیز ہے۔

کوک اسٹوڈیو سیزن 14 میں متعارف کرائے گئے کئی نئے چہروں میں ملک کی پہلی حجابی گلوکارہ ایوا بی بھی شامل ہیں۔

ایوا بی نے پہلے انٹرویو میں اپنے نام کے معنی خصوصی طور بتائے تھے۔

اُنہوں نے بتایا تھا کہ ’اُن کےنام کا پہلا حصّہ ایوا، زمین کی پہلی خاتون حوا کو خراج تحسین پیش کرتا ہے اور وہ خود بھی پاکستانی ریپنگ کمیونٹی میں پہلی خاتون ریپر ہیں‘۔

گلوکارہ نے حجاب پہننے کی وجہ بتاتے ہوئے کہا تھا کہ وہ اپنی شناخت کو حجاب کے نیچے پوشیدہ رکھتی ہے کیونکہ اس طرح وہ گمنام ہونے کے باوجود بااختیار محسوس کرتی ہیں۔