معروف برطانوی بزنش مین جم ریٹکلف نے انگلش پریمئیر لیگ کے نامور فٹ بال کلب چیلسی کو خریدنے کے لئے اربوں ڈالرز کی پیش کش کر دی ہے۔

برطانوی تاجر جم ریٹکلف نے گزشتہ روز پریمیئر لیگ کلب چیلسی کو خریدنے کے لیے 5.3 بلین ڈالرز کی پیش کش کی ہے۔

چیلسی فٹ بال کلب کے روسی مالک رومن ابرامووچ نے یوکرین پر روس کے حملے کے بعد اگلے ہفتے برطانوی حکومت کی طرف سے منظوری ملنے سے پہلے بلیوز کو 2 مارچ کو فروخت کے لیے پیش کیا تھا۔

برطانوی نشریاتی ادارے کی رپورٹ کے مطابق نیویارک کے بینک رائن گروپ کے ساتھ رومن ابراموچ کے چیلیسی فروخت کرنے کے مذاکرات کافی آگے پہنچ چکے ہیں، اور جلد ہی ابراموچ اس کا اعلان بھی کرنے والے ہیں۔

لیکن برطانوی بزنس مین جم ریٹکلف نے اب اپنی ٹوپی ایک بڑی اور بھاری بولی کی صورت میں رنگ میں ڈال دی ہے.

جم ریٹکلف کی اس بھاری پیش کش کا مطلب ہے کہ چیلسی میں 10 سالوں میں 1.75 بلین پاؤنڈ کی سرمایہ کاری ہوگی جبکہ مزید 2.5 بلین پاؤنڈ یوکرین میں جنگ کے متاثرین کی مدد کے لیے ایک خیراتی ٹرسٹ کے لیے پرعزم ہیں۔

بین الاقوامی میڈیا کی رپورٹ میں بتایا گیا ہے کہ ریٹکلف کی پیشکش لندن کلب کے لیے اب تک کی سب سے بڑی پیشکش ہے۔

برطانوی بزنس مین 69 سالہ جم ریٹکلف نے اس سے قبل 2019 میں چیلسی کو خریدنے کی کوشش کی تھی، مگر کامیاب نہ ہونے کے بعد اس نے فرانسیسی کلب ’نائس‘ کو خرید لیا۔

اپنے ایک بیان میں جم نے کہا کہ یہ پیش کش ایک برطانوی کلب کے لئے برطانوی بولی ہے۔

جم ریٹکلف نے مزید کہا کہا ہم اسٹامفورڈ برج میں سرمایہ کاری کریں گے تاکہ اسے عالمی معیار کا اسٹیڈیم بنایا جا سکے، جو چیلسی ایف سی کے لیے موزوں ہو۔

جم کا کہنا تھا کہ اگر موقع ملا تو ہم ٹیم میں سرمایہ کاری جاری رکھیں گے تاکہ یہ یقینی بنایا جا سکے کہ ہمارے پاس مردوں اور خواتین کے کھیلوں میں دنیا کے عظیم ترین کھلاڑیوں، کوچز اور معاون عملے کا فرسٹ کلاس سکواڈ موجود ہے۔