نیر بخاری نے کہا ہے کہ عمران خان کو پتہ ہے جرائم کی طویل فہرست پر جیل ٹھکانہ ہے۔

پیپلزپارٹی کے سیکرٹری جنرل نیر بخاری نے کہا ہے کہ اقتداری  نشہ ختم ہونے کے بعد عمران خان ملکی راز زیر بحث لاکر آئینی جرم کے مرتکب ہو رہے ہیں۔

انہوں نے کہا کہ سائبر دھمکی تھی تو امریکی سفارت خانے سے احتجاج کیوں نہ کیا گیا، غریبوں کی جیبوں پر ڈاکے ڈالنے والا عمران خان عوام کو ساتھ کھڑا ہونے کا کہہ رہا ہے۔

نیر بخاری نے کہا ہے کہ دنیا میں ملک کو تنہائی کا شکار کرنے والے کے منہ سے  ملکی وقار آزادی خودمختاری کا تذکرہ شرمناک ہے، پیپلز پارٹی اور اپوزیشن نے آئینی ہتھیار کے ذریعے ملک و قوم کیلئے ناسور بننے والے خطرناک سے نجات دلائی۔

پیپلزپارٹی کے سیکرٹری جنرل نے کہا کہ عمران خان قوم جانتی ہے عدم اعتماد سے قبل  باغی اور اتحادی ممبران تمھارے ٹائیگر اور شیرو تھے، چیف الیکشن کمیشنر تعیناتی سفارشی عمران خان کس منہ سے استعفے کا مطالبہ کر رہا ہے۔

انہوں نے کہا کہ سمندر پار پاکستانیوں سے ہتھیائے گئے عمران خان کو پتہ ہے جرائم کی طویل فہرست پر جیل ٹھکانہ ہے، بے نظیر بھٹو شہید نے ملک کے خلاف  دہشتگردی کی جنگ میں شہادت قبول کی، وہ عمرانی دور حکومت ہی تھا جب کسان کاشتکار زمیندار سڑکوں پر تھے۔