سری لنکا میں سیاسی بحران  کی وجہ سے آسٹریلوی کھلاڑیوں  نے سری لنکا کے دورے پر تشویش کا اظہار  کیا ہے۔

تفصیلات کے مطابق  آسٹریلوی کرکٹرز ایسوسی ایشن کے سربراہ ٹوڈ گرین برگ نے کہا کہ آسٹریلیا کے اسکواڈ نے معاشی بحران کی وجہ سے اپنے آئندہ دورہ سری لنکا کے بارے میں اخلاقی خدشات کا اظہار کیا ہے لیکن وہ اس دورے کو آگے بڑھانے کے فیصلے کی حمایت کریں گے۔

انہوں نے کہا کہ بالآخر ہمارے کھلاڑی کرکٹ کھیلنا جاری رکھنا چاہتے ہیں اور  دورے کے انتظامات اور منصوبہ بندی کے بارے میں  کرکٹ آسٹریلیا سے ہدایت، رہنمائی اور مشورہ لیں گے۔

آسٹریلیا نے جون اور جولائی میں سات ہفتوں کے دورے کے لیے تین مضبوط اسکواڈز کا اعلان کیا ہے، جس میں ایک ٹی ٹوئنٹی سیریز، پانچ ایک روزہ بین الاقوامی میچوں کے ساتھ ساتھ گال میں دو ٹیسٹ بھی شامل ہیں۔

سری لنکا 1948 میں آزادی کے بعد سے اپنے بدترین معاشی بحران سے دوچار ہے، غیر ملکی زرمبادلہ کی شدید قلت نے درآمدات میں شدید کمی کی ہے، بشمول ایندھن اور ادویات جیسی ضروری اشیاء۔

واضح رہے کہ مارچ کے آخر سے ملک بھر میں مظاہروں نے ہلچل مچا دی اور دو ہفتے قبل کولمبو میں حکومت کے حامیوں اور مظاہرین کے درمیان جھڑپوں کے بعد تشدد پھوٹ پڑا تھا جس کے نتیجے میں ملک بھر میں مزید واقعات رونما ہوئے تھے جن میں 9 افراد ہلاک اور تقریباً 300 زخمی ہوئے تھے۔