عید الاضحٰی کے موقع پر سنتِ ابراہیمی کے فرض کو پورا کرنے کے لیے لوگ قربانی کا جانور اللہ کی راہ میں قربان کرتے ہیں۔

منڈی سے جب جانور گھر لایا جاتا ہے تو بڑوں کے ساتھ ساتھ بچوں کی تو جیسے عید ہی ہوجاتی ہے اور وہ اپنے جانور کا ان کی شخصیت اور عادات کے مطابق نام بھی رکھتے ہیں۔

آج ہم آپ کو بچوں کے تجویز کردہ ناموں والے جانوروں سے ملواتے ہیں۔

چاند بیل دکھنے میں کافی خوبصورت نظر آتا ہے جو نہ صرف قدو قامت کے اعتبار سے تھوڑا سا نمایاں ہوتا ہے بلکہ اس کی خاص بات یہ ہے کہ اس کے سر پر موجود دو بڑے بڑے سینگ ہوتے ہیں۔

خرّانٹ بیل یا گائے کا نام بھی کافی مقبولیت رکھتا ہے، ایسے جانور کسی کو اپنے قریب نہیں آنے دیتے اور ٹکر مارنے کے لیے ہمیشہ تیار رہتے ہیں۔

یہ جانور انتہائی غصے والا ہوتا ہے اور ہر وقت پھنکارتا رہتا ہے، ایسے جانور کو قابو میں لانے کے لیے اس کی ناک میں نکیل اور مہرہ باندھا جاتا ہے۔

راکٹ گائے وہ ہوتی ہے جو گاڑی سے اترتے ہی لوگوں کا شور سن کر دوڑ لگا دیتی ہے اور پھر اس کا کسی کے ہاتھ آنا کافی مشکل ہوجاتا ہے۔

اگر یہ رسی تڑانے میں کامیاب ہوجائے تو پھر یہ انتہائی تیز رفتاری کے ساتھ راہِ فرار اختیار کرتا ہے اور بہت مشکل سے قابو میں آتا ہے،پھرتی اور تیز رفتار کے باعث اس کو راکٹ کا نام دیا جاتا ہے۔

کیٹل فارم کے ہیوی ویٹ جانور لوگوں کی خاص توجہ حاصل کرتے ہیں، یہ جانور اپنے لمبے قدو جسمات کے باعث قیمت میں بھی بھاری ہوتے ہیں، کراچی کی مویشی منڈی میں بھاری بھرکم جانور دیکھنے لوگ دور دور سے آتے ہیں۔

شریف گائے وہ ہوتی ہے جس کے مالکان اپنے 5 یا 6 سال کے بچوں کے ہاتھ میں بھی اس کی رسی تھما دیتے ہیں اور وہ بچہ بڑی مزے سے اس کو ٹہلا رہا ہوتا ہے۔ اس کے علاوہ یہ انتہائی شریف النفس ہوتے ہیں۔