ایمل ولی خان نےکہا ہے کہ آئین کو بنانے اور تسلسل قائم رکھنے کیلئے سیاسی جماعتوں نے بڑی قربانیاں دی۔

صدر اے این پی خیبرپختونخوا ایمل ولی خان نے اپنے ایک بیان میں کہا کہ پرویز مشرف ہو یا کوئی اور آئین پاکستان کے تحت ہی ڈیل کیا جائے، پرویز مشرف کی صحتیابی کیلئے دعاگو ہیں لیکن اس ملک میں ہماری نعشوں کو بھی قید کیا گیا ہے۔

ایمل ولی خان نے کہا کہ 1973ء آئین واحد دستاویز ہے جس پر پورا پاکستان متفق ہے، اگر کوئی خود کو پاکستان کا شہری سمجھتا ہے تو وہ قانون اور آئین سے کبھی نہیں بھاگے گا۔

انہوں نے کہا کہ ہم اگر پاکستان کی ترقی چاہتے ہیں تو یہی آئین، پارلیمنٹ کی بالادستی اور قانون ہی اسکی ضمانت ہے۔

صدر اے این پی خیبرپختونخوا کا کہنا تھا کہ پاکستان کے تمام شہریوں نے اس آئین کا احترام کیا ہے اور اسی کے تحت تمام اداروں کو اختیار اور قدر حاصل ہے۔

ایمل ولی خان کا یہ بھی کہنا تھا کہ اسی آئین کو بنانے اور تسلسل قائم رکھنے کیلئے سیاسی جماعتوں نے بڑی قربانیاں دی ہیں۔

انہوں نے کہا کہ اسی آئین کیلئے ایک وزیراعظم کو پھانسی دی گئی اور کئی وزرائے اعظم کو منصب سے ہٹایا گیا جبکہ اسی آئین کو بچانے کی وجہ سے پاکستان کے کسی وزیراعظم نے اپنی آئینی مدت پوری نہیں کی۔

ایمل ولی خان نے کہا کہ اے این پی کے قائدین نے بالخصوص اور دیگر جماعتوں کے رہنماؤں نے بالعموم جلاوطنیاں برداشت کیں۔

انہوں نے یہ بھی کہا کہ تمام تر مصیبتوں اور مشکلات کے باوجود ہم پاکستان اور آئین پاکستان کے ساتھ کھڑے رہے ہیں۔

ایمل ولی خان کا کہنا تھا کہ عوامی نیشنل پارٹی نے عوامی خدمت کے جذبے کے تحت اس ملک کی ترقی میں بھرپور کردار ادا کیا ہے۔

ان کا یہ بھی کہنا تھا کہ آئین سے بالاتر کوئی نہیں، وہ فرد واحد ہو یا کوئی ادارہ۔ کسی فردواحد یا مخصوص ادارے کی مرضی سے اس ملک کو نہیں چلایا جاسکتا۔

ایمل ولی خان نے کہا کہ اس ملک میں جو بھی فیصلے ہوں گے وہ آئین اور قانون کے رو سے ہوں گے، یہی واحد راستہ ہے۔

انہوں نے یہ بھی کہا کہ آئین پاکستان کے تحت ہر شہری کے تحفظ کی ضمانت اور ہر شہری سے سوال کا حق حاصل ہے۔

صدر اے این پی خیبرپختونخوا ایمل ولی خان نے مزید کہا کہکسی پاکستانی شہری کو ملک آنے سے کوئی نہیں روک سکتا جبکہ وہ شہری بھی آئین و قانون کو مانے گا اور اس پر عمل کرنے کا پابند ہوگا۔