لاہورہائی کورٹ نے مراد راس کی درخواست کی سماعت بغیر کارروائی کےغیرمعینہ مدت کے لیے ملتوی کردی۔ 

تفصیلات کے مطابق لاہورہائی کورٹ نے پی ٹی آئی کے رہنما مراد راس کی پولیس کی جانب سے ہراساں کرنے اور مقدمات کے اخراج کیلئے درخواست پر سماعت غیر معینہ مدت کے لئے ملتوی کی۔

عدالت نے پنجاب حکومت اور پولیس سے رپورٹ طلب کررکھی ہے، جسٹس سردار محمد سرفراز ڈوگر نے مراد راس کی درخواست پر سماعت کرنا تھی۔

درخواست میں وزیراعظم، وزیراعلی پنجاب، وفاقی حکومت سمیت دیگر کو فریق بنا کر مؤقف اختیار کیا گیا کہ 25 مئی سے لے کرحکومت بلاجوازغیرقانونی کارروائیاں کر رہی ہے۔

مراد راس کی درخواست میں مؤقف اپنایا گیا کہ درخواست گزارکا پی ٹی آئی سے تعلق ہے اور سیاسی بنیادوں پر مقدمات میں ملوث کیا جا رہا ہے۔ 25 مئی کو لانگ مارچ کے وقت پی ٹی آئی کارکنان اور رہنمائوں پربد ترین تشدد کیا گیا۔

وکیل درخواست گزار نے عدالت سے استدعا کی کہ لانگ مارچ کے باعث نامعلوم مقدمات میں نامزد کیا جا رہا ہے۔ 25 مئی سے لے کر 11 جون تک درخواست گزار کے خلاف درج کیے گئے مقدمات کی تفصیلات فراہم کی جائیں۔

درخواست میں یہ بھی استدعا کی گئی کہ پولیس اور ریاستی اداروں کو درخواست گزار کو غیر قانونی ہراساں کرنے سے روکا جائے اور درخواست گزار کے خلاف درج کیے گئے تمام مقدمات خارج کیے جائیں۔