مرتضیٰ وہاب نے کہا ہے کہ جو قومیں صحت مندسرگرمیوں کو فروغ نہیں دیتیں وہ پیچھے رہ جاتی ہیں۔

ایڈمنسٹریٹر کراچی بیرسٹر مرتضیٰ وہاب نے کشمیر روڈ اسپورٹس کمپلیکس میں نو تعمیر شدہ فٹ بال گراؤنڈ کا افتتاح کردیا۔

اس موقع پر ایڈمنسٹریٹر کراچی الیون اور ایم سی الیون کے درمیان فٹ بال کا نمائشی میچ بھی کھیلا گیا۔

مرتضیٰ وہاب نے کہا کہ 2012 میں شروع ہونے والا یہ منصوبہ سات سال سے تعطل کا شکار تھا، 23 کروڑ روپے کی لاگت سے فٹ بال گراؤنڈ تعمیر کیا گیا تھا، فٹ بال گراؤنڈ اور دیگر کھیلوں سے متعلق ہال بھی تعمیر کیے گئے تھے۔

 ایڈمنسٹریٹر کراچی نے کہا کہ شہریوں کو کھیلوں کی سہولتیں مہیا کرنے کے لئے کھیلوں کے میدانوں کو آباد کر رہے ہیں، بچوں اور نوجوانوں کی صلاحیتوں کو اجاگر کرنے کے لئے انہیں سہولتیں مہیا کرنا ضروری ہیں۔

انہوں نے کہا کہ کراچی کے تمام اضلاع میں ایک ایک فٹ بال گراؤنڈ حکومت سندھ تعمیر کر رہی ہے، کشمیر روڈ اسپورٹس کمپلیکس میں ٹیبل ٹینس، بیڈمنٹن،سوئمنگ پول،فٹ بال،اسکوائش اور واکنگ ٹریک کی سہولیات مہیا کی گئی ہیں۔

مرتضیٰ وہاب نے کہا کہ کراچی میں کھیلوں کے میدان، اوپن اسپیس اور پارکوں کی بحالی کا کام جاری ہے، بچوں اور نوجوانوں کو کھیلتا دیکھ کر دلی مسرت ہوتی ہے، جو قومیں صحت مند سرگرمیوں کو فروغ نہیں دیتیں ان کے نوجوان پیچھے رہ جاتے ہیں۔